Şuşa şəhərinin 260 illik yubileyi qeyd olunub

“ŞUŞANI GÖRMƏYƏN ŞAGİRDLƏRİN ÖZ DOĞMA YURD-YUVALARINA BAĞLILIĞI İNSANDA FƏRƏH HİSSİ OYADIR”

Dünən Şuşa şəhərinin əsasının qoyulmasının 260 illiyi və dahi Üzeyir bəy Hacıbəylinin 125 illik yubileyilə bağlı tədbir keçirilib. Şuşa şəhəri 9 saylı orta məktəbin direktoru Qədim Abdullayev tədbirin rəhbərlik etdiyi təhsil ocağının təşkilatçılığı ilə keçirildiyini bildirib: “Bütün dünyaya bəllidir ki, Qarabağ Azərbaycanın əzəli və əbədi torpaqlarıdır. Qarabağın mərkəzi kimi Şuşa həm siyasi, həm də mədəni baxımdan tarixdə iz qoyan şəhərlərdəndir. Qarabağ xanı Pənahəli xanın 1750-ci ildə əsası qoyduğu Şuşa şəhəri bu gün işğal altındadır. Amma biz əminik ki, bütün işğal edilmiş torpaqlarımız, o cümlədən Şuşa tezliklə işğaldan azad olunacaq”.

Q.Abdullayev bildirib ki, Şuşa Azərbaycan mədəniyyətinə dahi şəxsiyyətlər bəxş edib: “Onlardan biri olan Üzeyir bəyin 125 illiyi respublika səviyyəsində qeyd olunub. Amma Şuşanı təmsil edən bir təhsil ocağı olaraq, dahi bəstəkarı yad etmək mənəvi borcumuzdur. Məktəbin müəllim heyətinin əməyi və şagirdlərin səyi ilə həm Şuşanın 260 illik, həm də Üzeyir bəy Hacıbəylinin 125 illik yubileyi ilə bağlı ədəbi-bədii kompozisiya hazırlanıb. Şuşanı görməyən şagirdlərin öz doğma yurd-yuvalarına bağlılığı insanda fərəh hissi oyadır”. Tədbirdə Şuşanın tarixini, mədəniyyətini və işğaldan sonrakı görüntülərini əks etdirən videoçarx nümayiş etdirilib. Məktəblilərin iştirakı ilə Şuşaya həsr edilən ədəbi-bədii kompozisiya nümayiş olunub. Həmçinin şagirdlərin iştirakı ilə Ü.Hacıbəylinin “Arşın mal alan” operattasından parçalar oynanılıb.

Şuşa rayon təhsil şöbəsinin nümayəndəsi Əyyub Əbdüləzimov şagirdlərin əməyini yüksək qiymətləndirərək, belə tədbirlərin mühüm əhəmiyyət kəsb etdiyini diqqətə çatdırıb. Onun sözlərinə görə, işğal olunmuş rayonların tarixinə, mədəniyyətinə aid keçirilən kütləvi tədbirlər gənc nəslin vətənpərvər ruhda yetişməsində böyük rol oynayır: “Çox təəssüf hissi ilə qeyd etməliyəm ki, işğaldan sonra dünayaya gələn və yeniyetmə yaşlarına çatan məktəblilərimiz öz dədə-baba torpaqlarını görməyiblər. Amma biz əminik ki, öz evimizə, ocağımıza geri dönəcəyik. Azərbaycan dövlətinin beynəlxalq arenada apardığı uğurlu siyasət bunu deməyə əsas verir”.

Əməkdar müəllim Sevil Babayeva bildirib ki, işğal edilmiş rayonların təhsil ocaqlarına dövlət tərəfindən hər zaman xüsusi diqqət və qayğı göstərilir. Onun sözlərinə görə, Şuşa rayonuna məxsus orta məktəblərdə hər zaman vətənpərvərlik ruhunda tədbirlər keçirilir: “Bu gün şagirdlərin hazırladıqları bu ədəbi-bədii kompozisiya məni bir anlığa Şuşaya apardı. Orada yaşadığım illərə aid gözəl xatirələr kino lenti kimi gözümün önündən keçdi. Tədbir iştirakçılarına belə duyğular yaşatdıqları üçün tədbirdə əməyi olan müəllim həmkarlarıma və şagirdlərə təşəkkürümü bildirirəm”.

Tədbirdə iştirak edən Şuşa rayon təhsil şöbəsinin əməkdaşları Zülfiyyə Həsənova, Gülşən Məmmədova, Rəsmiyyə Məmmədova və rayonun digər orta məktəblərinin rəhbərləri Qütabə Məmmədova, Şükür Nəsirov, eləcə də başqaları məktəblərdə kütləvi tədbirlərin keçirilməsinin şagirdlərin şəxsiyyət kimi yetişməsində böyük əhəmiyyətini qeyd ediblər.

BƏXTİYAR

525-ci qəzet.- 2010.- 15 dekabr.- S.7.