IV Beynəlxalq Mstislav Rostropoviç festivalı yekunlaşıb

Bakıda keçirilən IV Beynəlxalq Mstislav Rostropoviç festivalı Heydər Əliyev Sarayında növbəti konsert proqramı ilə başa çatıb. Heydər Əliyev Fondunun, Mədəniyyət və Turizm Nazirliyinin, Mstislav Rostropoviç Fondunun birgə təşkilatçılığı ilə gerçəkləşən festivalın son günündə tamaşaçılar İsrail Filarmonik Orkestrinin ifasında maraqlı əsərlər dinləyiblər. Orkestrin bədii rəhbəri və dirijoru Zubin Meta, solisti isə Pudolf Bukbinder (fortepiano) olub.Dinləyiciləri salamlayan Zubin Meta son illər Bakıda aparılan böyük abadlıq və quruculuq işlərini ölkəmizin inkişafında əhəmiyyətli olduğunu dilə gətirib: “Mstislav Rostropoviçlə uzun illər dostluq etmişəm və ondan çox şey öyrənmişəm. O tez-tez mənə doğma vətəni Azərbaycana gəlməyi məsləhət görürdü. Çox sevinirəm ki, bu gün onun adını daşıyan belə möhtəşəm bir festivalda iştirak etməklə yanaşı, həm də çıxış edirəm. Mən Bakıda olmağımdan qürur duyuram. Burada sənətə və sənətkara göstərilən böyük hörmətin şahidi oldum. Azərbaycan xalqının musiqiyə olan sevgisi məni valeh etdi. Bu xalqın olduqca gözəl və zəngin mətbəxi də məni heyrətləndirdi”. Konsertdə xarici ölkə bəstəkarlarının əsərləri ifa olunub. Sarayın foyesində M.Rostropoviçin həyat və yaradıcılığını əks etdirən sərgi təşkil edilib.

HÜSNİYYƏ

525-ci qəzet.- 2010.- 21 dekabr.- S.7.