Əmir Pəhləvanın romanı Almaniyada işıq üzü görüb

Tanınmış azərbaycanlı yazıçı-dramaturq, kinorejissor Əmir Pəhləvanın sayca altıncı kitabı Almaniyada nəşr olunub. Vesti.az saytına bu barədə məlumat verən yazıçının sözlərinə görə, “Ayrılıq“ romanı onun “Qafqazda qardaş çağırışı” əsərlər silsiləsinin davamı kimi, ingilis dilində çap olunub. Ə.Pəhləvan qeyd edib ki, bu kitabda son 25 ilin Ümumqafqaz faciələrindən, qanlı oyunun təşkilatçıları və ideoloqlarından, həmçinin bu oyunun məcburi iştirakçılarından bəhs edilir. Yazıçı eyni zamanda, romanın kuliminasiya nöqtəsini BP şirkətinin Böyük Britaniyadakı ofisinin yaxınlığında azərbaycanlı İsa ilə erməni Bandianinin dialoqunun təşkil etdiyini xüsusi vurğulayıb. Bu görüşdən sonra İsa və Bandiani, Qafqaz ənənələrinə uyğun olaraq, ingilis rezidenti Mişelə qarşı birgə mübarizə aparmaq yolunda duz-çörəyə and içirlər. Romanda bu suallara cavab verilir: İsanı və Bandianini vətəndən uzaq düşməyə nə məcbur etdi? Kimdir günahkar? Avropa, yoxsa qonşu Rusiya və ya İran? Yazıçının bildirdiyinə görə, romandakı hadisələr gərgin, dramatik və detektiv axında cərəyan edir. Müəlliflik hüququ və satış hüququ alman nəşriyyatına məxsus olduğuna görə, roman hələlik yazıçının www.amirpahlavan.com. ünvanlı saytında yerləşdirilməyib. Yaxın gələcəkdə romanın Azərbaycan dilində nəşri gözlənilir.

Fərid TEYMURXANLI

525-ci qəzet.- 2010.- 22 dekabr.- S.7.