Həsən Seyidbəylinin 90 illiyi qeyd olunub

Muzey Mərkəzində görkəmli Azərbaycan kinorejissoru, kinodramaturq, ssenarist Həsən Seyidbəylinin 90 illik yubileyi keçirilib. Gecə Həsən Seyidbəylinin həyat və yaradıcılığının müxtəlif mərhələlərini əks etdirən videoçarxın nümayişi ilə başlanıb. Dövlət Film Fondunun təşkilatçılığı ilə gerçəkləşən tədbirdə çıxış edən fondun direktoru, əməkdar incəsənət xadimi Cəmil Quliyev Həsən Seyidbəylinin yaradıcılıq yoluna ətraflı nəzər salıb: “Kino tariximizin bir sıra ən parlaq səhifələri məhz Həsən Seyidbəylinin adı ilə bağlıdır. Onun ssenariləri əsasında “Doğma xalqımıza” bədii-sənədli, “Qızmar günəş altında”, “Uzaq sahillərdə” bədii, “Toral və Zəri”, “Sağ ol, dostum” animasiya, “Sovet Azərbaycanı” televiziya, “Kamillik” sənədli filmləri yaradılıb. Həsən Seyidbəyli ilk dəfə 1947-ci ildə “Bakıdan Göygölədək”, bunun ardınca 1949-cu ildə “Quba bağlarında” və “Tərtərçay vadisində”, “Böyük yol” kinoçerklərini lentə alıb. “Bizim Cəbiş müəllim”, “Nəsimi”, “Telefonçu qız”, “Xoşbəxtliyin qiyməti” və başqa bədii filmlərilə əbədiyaşarlıq qazanıb”. Kinoşünas Aydın Kazımzadə H.Seyidbəylinin kinorejissoru kimi səkkiz tammetrajlı bədii filmə quruluş verdiyini, bunlardan altısının həm də ssenari müəllifi olduğunu dilə gətirib. Tədbirdə Azərbaycan Kinematoqrafçılar İttifaqının sədri, xalq yazıçısı Rüstəm İbrahimbəyov, xalq artisti Rasim Balayev və başqaları rejissorun zəngin yaradıcılıq irsi haqqında fikirlərini bölüşərək, onun Azərbaycan kinematoqrafiyasının inkişafındakı misilsiz xidmətlərini vurğulayıblar.

HÜSNİYYƏ

525-ci qəzet.- 2010.- 28 dekabr.- S.7.