Azərbaycan Aşıqlar Birliyində illik hesabat iclası olub

Birliyin sədri, xalq şairi Zəlimxan Yaqub aşıq sənəti ilə bağlı bu il də bir sıra önəmli tədbirlərin həyata keçirildiyini bildirib: “Görkəmli aşıqlarımızın yubileyləri qeyd edildi, onlar haqqında kitablar nəşr olundu. Bu tədbirlərin içərisində ən yadda qalan və yaxşı mənada səs-küyə səbəb olan layihə Beynəlxalq Aşıq Festivalının keçirilməsi oldu. Aşıq sənətinin dünyaya tanıdılmasında görülən işlər bizim sevinc və qürur mənbəyimizdir. Biz sevinirik ki, hörmətli prezidentimiz İlham Əliyevin və Heydər Əliyev Fondunun prezidenti, YUNESKO-nun xoşməramlı səfiri, millət vəkili Mehriban Əliyevanın yüksək diqqət və qayğısı aşıq sənətinin təbliğində böyük rol oynayır”. Zəlimxan Yaqub qeyd edib ki, “Sazımız və Sazbəndimiz” adlı kitab hazırlanır, toplunun üzümüzə gələn il oxuculara təqdim olunması nəzərdə tutulur. Xalq şairi 2011-ci il üçün planlaşdırılan tədbirlər haqqında da qısa məlumat verib: “2011-ci ildə keçiriləcək tədbirlərimiz çoxdur. Ən başlıcası isə Aşıq Ələsgərin 190 illiyi ilə bağlı bölgələrdə təşkil ediləcək silsilə tədbirlərdir. Bundan başqa, Molla Cümə, Sarı Aşıq günləri, “Sazımız və Sazbəndimiz” kitabının nəşri və təqdimat mərasimi, “Ozan” jurnalının daha yüksək səviyyədə nəşr olunması və bir sıra mühüm tədbirlərin keçirilməsi planlaşdırılır”. Tədbirdə çıxış edən professor Qəzənfər Paşayev aşıq sənətinə getdikcə artan maraq və qayğının təqdirəlayiq bir hal olduğunu vurğulayıb: “Aşıqlar Birliyinin yaradılması aşıq sənətinin, sazın, aşıqlarımızın ən böyük uğuru hesab etmək olar. Vaxt vardı ki, aşıq sənəti diqqətdən kənar qalmışdı və yavaş-yavaş xalqın yaddaşından silinmək təhlükəsi ilə qarşılaşmışdı. Ancaq son vaxtlar görülən tədbirlər nəticəsində aradan qaldırıldı”. Filologiya elmləri doktoru, professor Məhərrəm Qasımlı, şair İlyas Tapdıq, alimlərdən İsmayıl Vəliyev, Rüstəm Kamal və digər iştirakçılar da öz çıxışlarında aşıq sənətinin tarixindən və bu sahədə aparılan tədqiqatların əhəmiyyətindən danışıblar.

GÜNEL

525-ci qəzet.- 2010.- 30 dekabr.- S.7.