Gənc rəssamların sərgisi təşkil olunub

Gənclər və İdman Nazirliyilə Rəssamlar İttifaqı Vəcihə Səmədova adına Mərkəzi Sərgi Salonunda 2 fevral Gənclər günü münasibətilə Azərbaycanın gənc rəssamlarının sərgisini təşkil edib. Sərgidə 180-ə yaxın rəsm əsəri nümayiş olunub. Tədbirdə çıxış edən Rəssamlar İttifaqının katibi, xalq rəssamı Ağaəli İbrahimov 15 ilə yaxındır ki, mütəmadi olaraq Gənclər və İdman Nazirliyi ilə birgə sərgilər keçirdiklərini bildirib. Bu illər ərzində sərgilərdə iştirak edən gənc rəssamlardan artıq 7-si əməkdar rəssam adına layiq görülüb: “Son illər gənclərə böyük qayğı göstərilir, prezident təqaüdü alırlar. Gənclərin həm xaricdəki sərgilərdə iştirakı, eyni zamanda fərdi sərgilərinin təşkili dəstəklənir”. Sonra Rəssamlıq Akademiyasının prorektoru Səlhab Məmmədov, Gənclər və İdman Nazirliyinin, eləcə də Mədəniyyət və İncəsənət Universitetinin nümayəndələri çıxış edib, yaradıcı gənclər barədə fikirlərini bölüşüblər.

S.QARAYEVA

525-ci qəzet.- 2010.- 3 fevral.- S.7.