Cavanşir Yusiflinin yeni kitabı nəşr olunub
TANINMIŞ ƏDƏBİYYATŞÜNAS BU KİTABINDA POEZİYA İLƏ BAĞLI BİR SIRA MARAQLI MƏSƏLƏNİ TƏDQİQATA CƏLB EDİB
“Mütərcim” nəşriyyatı tənqidçi Cavanşir Yusiflinin yeni kitabını – “Əli Kərim üslubu, yaxud fərdi yaradıcılıqdan ədəbiyyat tarixinə baxış”ı nəşr edib. Kitabda görkəmli Azərbaycan şairi Əli Kərimin fərdi yaradıcılıq üslubu araşdırılır, onun poeziyasının ənənə ilə müxtəlif aspektlərdən görünən əlaqə və münasibətləri tədqiqata cəlb edilir. Müəllif araşdırmasında milli ədəbiyyat tarixi və nəzəri fikir üçün maraq doğuracaq məsələlərə toxunur. O, klassik şeirin dəyərli nümunələri ilə müasir poeziya mətnləri arasında əlaqələrdən bəhs edir, müasir poeziyanı yaradan şəxslərin əsərlərindən ədəbiyyat tarixinin necə görünməsini araşdırır.
Tədqiqatın giriş hissəsində görkəmli Azərbaycan alimi Əhməd Cəfəroğlunun “Qaraxanlılar dövrü türk ədəbiyyatı” məqaləsinə istinad edilir. Alimin adıçəkilən məqaləsində belə bir fakt qeyd olunub ki, 1909-cu ildə Orta Asiyada aparılan arxeoloji qazıntılar zamanı tapılan Saraycıq teşti üzərində Əhməd Yəsəvinin hikmətləri həkk edilibmiş. “Əli Kərim üslubu, yaxud fərdi yaradıcılıqdan ədəbiyyat tarixinə baxış” kitabında qeyd edilir ki, “həmin əşyalar üzərində həkk edilən misralar sonradan bizim sevdiyimiz şairlərin ruhunda, üslubunda, poetik nəfəsində təkrar doğuldu. Fikrimizcə, hər bir milli ədəbiyyatda fərdi yaradıcılıq üslubunu tanıdan, müəyyənləşdirən ən ümumi cəhət elə bundan ibarətdir”.
Kitab “Giriş əvəzi“, “Əli Kərim üslubu” və “Bədii mətndə poetik düşüncənin ritmi” adlı hissələrdən ibarətdir.
AYTƏN
525-ci qəzet.-
2010.- 3 fevral.- S.7.