Milli Kitab Mükafatının “Qısa siyahı”sı açıqlandı

Ötən gün “Əli və Nino” kafesində Milli Kitab Mükafatının (MKM) “Qısa siyahı”sı açıqlanıb. Tədbirdə çıxış edən mükafatın təsisçisi, “Əli və Nino” Kitab Evinin rəhbəri Nigar Köçərli Ekspertlər Şurasının rəyini açıqlayıb və onluğa düşən nasirlərin adlarını elan edib. “Qısa siyahı”da adları yanvarın 26-da ictimaiyyətə açıqlanan 20 müəllifdən 10-u – Əlabbas Bağırov “Qiyamçı”, Nəriman Əbdülrəhmanlı “Yalqız”, Eyvaz Əlləzoğlu “Odunçu geri qayıdır”, Elxan Qaraqan “A” romanı, Samid Əliyev “Sem şaqov v napravlenii zakata” povesti, Şərif Ağayar “Kərpickəsən kişinin dastanı” hekayəsi, Kamran Nəzirli, Əjdər Ol, Rafiq Tağı və Fəxri Uğurlu isə hekayələr toplusu ilə yer alıb. Onluğa daxil olan əsərlər kitab şəklində nəşr edilərək kitabxanalara pulsuz paylanacaq. Təsisçi çıxışında bildirib ki, onluqda yer alan əsərlər qiymətləndirilmək üçün Çingiz Abdullayev, Rüstəm İbrahimbəyov, Vaqif Səmədoğlu, Elçin Şıxlı, Rəşad Məcid, Afaq Məsud, Nərgiz Cəlilova, Hamlet İsaxanlı, Rəbiyyət Aslanova, Ramiz Fətəliyev, Balaş Qasımov və Elnur Baimovun təmsil olunduğu Münsiflər Heyətinə təqdim ediləcək. N.Köçərlinin sözlərinə görə onluqdan seçiləcək qaliblərin adları may ayında elan ediləcək və təntənəli mükafatlandırılma mərasimi təşkil olunacaq. Xatırladaq ki, müsabiqəyə ümumilikdə 265 əsər təqdim olunmuşdu. Layihənin baş sponsoru “Azercell Telekom” MMC, rəsmi sponsorları “Azersun Holdinq” və “Qarant Sığorta” şirkətləridir. Mədəniyyət və Turizm Nazirliyi, Gənclər və İdman Nazirliyi layihəyə dəstək verirlər.

S.MÜRVƏTQIZI

525-ci qəzet.- 2010.- 11 fevral.- S.7.