Bakıda klassik türkmən şairi Molla Nəfəsin kitabı nəşr olunub

“Min bir mahnı” nəşriyyatı “TÜRKSOY Kitabxanası” seriyasından klassik türkmən şairi Molla Nəfəsin “Bu məkana gəlmişəm” kitabını çap edib. Nəşriyyatdan verilən məlumata görə, şairin anadan olmasının 200 illiyi ilə əlaqədar işıq üzü görən kitabda Molla Nəfəsin əsərlərindən nümunələr toplanıb. Kitab 31 mart-4 aprel 2009-cu ildə İstanbulda TÜRKSOY tərəfindən keçirilən “Türk dilləri arasında uyğunlaşdırma çalışmalarının bugünkü durumu və problemlər” mövzusunda Beynəlxalq simpoziumun tövsiyələrinə, yekun bəyannaməsinə uyğun olaraq nəşr edilib.

Annaqurban Aşırovun tərtib etdiyi kitabı türkməncədən çevirən filologiya elmləri doktoru, türkoloq Ramiz Əsgər topluya “Böyük türkmən şairi Molla Nəfəs” sərlövhəli geniş ön söz yazıb, şairi Azərbaycan oxucularına ətraflı tanıdıb: “ XIX əsr türkmən poeziyası tarixinə parlaq istedad sahibi kimi daxil olan Molla Nəfəs türkmən ədəbiyyatının görkəmli nümayəndələri Əndəlib, Azadi, Məxdimqulu, Məğribi, Kəminə, Talibi, Katibi, Seyidi, Zəlili ilə bir sırada dayanır. Onun bir-birindən gözəl gəraylı, qoşma və müxəmməsləri, ictimai-siyasi şeirləri, dastanları onillilərdən bəri türkmən xalqının zövqünü oxşayır, gənc nəsli milli ruhda tərbiyə edir”.

Ön sözdə qeyd olunub ki, türkmən xalqı öz böyük oğlunun 200 illik yubileyinə ciddi hazırlaşır: “Türkmənistan Elmlər Akademiyası Marı vilayətinin icra hakimiyyəti ilə birgə aprelin 7-dən 10-dək Marı şəhərində “Molla Nəfəs və XIX əsrdə türkmənlərin həyatı” mövzusunda beynəlxalq elmi konfrans keçirəcək. Tədbirdə şairin həyatı və dövrü, onun lirikası, “Zöhrə-Tahir” dastanı, Molla Nəfəsin poetik şəxsiyyəti, sənətkarın ədəbi irsi və xalq yaradıcılığı kimi mövzular müzakirə ediləcək”.

Qeyd edək ki, bu nəşr Molla Nəfəsin Azərbaycanda çap olunan ilk kitabıdır.

SARA

525 ci qəzet.- 2010.- 11 fevral.- S.7.