Azərbaycan təhsili ötən ildə: uğurlar və perspektivlər

“Ötən il Prezidentin Ehtiyat Fondundan qəza vəziyyətindəki məktəblərin bərpası üçün 16 milyon, texniki peşə məktəblərinin inkişafı üçün 2 milyon, məktəbəqədər təhsilin inkişafı üçün 2 milyon, Tibb Universitetinin klinikasının tikintisinin tamamlanması üçün 3 milyon manat vəsait ayrılıb. Son 5 ildə təhsil işçilərinin əməkhaqqısı 5 dəfə, tələbələrin təqaüdü 10 dəfə artıb. Hazırda dövlət bir ali məktəb tələbəsinin təhsilinə 2102 manat xərc çəkir”. Bunu ötən ilin yekunlarını dəyərləndirərkən təhsil naziri Misir Mərdanov deyib. Nazirin sözlərinə görə, təhsil işçilərinin orta aylıq əməkhaqqı ilbəil artaraq 2008-ci ildəki 220 manatdan 2009-cu ildə 268,5 manata yüksəlib. Dövlət büdcəsinin tərkibində ötən il təhsilə ayrılan faktiki xərclər 1.097 milyard manat olduğu halda, bu il büdcədən təhsilə 1,2 milyard manat ayrılıb. İnvestisiyalarin həcmi 2008-ci ildə 220 milyon manat, ötən ildə 57 milyon manat təşkil edib. Bu il üçün investisiya xərcləri 47,7 milyon manat müəyyənləşdirilib. Ötən ilin ən vacib hadisəsi uzun illərdən bəri müzakirə olunan “Təhsil haqqında” qanunun qəbulu olub. Qanunun icra mexanizmləri ilə bağlı Təhsil Nazirliyi 35 sənəd hazırlayaraq Nazirlər Kabinetinə təqdim edib. Artıq bu sənədlərdən 6-sı təsdiqlənib.

SON 2 İLDƏ İLK DƏFƏ OLARAQ ÖLKƏ ÜZRƏ 28 YENİ UŞAQ BAĞÇASI TİKİLİB

M.Mərdanov deyir ki, bugünədək 31 məktəbəqədər təhsil müəssisəsi əsaslı təmir edilib və müasir avadanlıqlarla təchiz olunub. Həyata keçirilən tədbirlər nəticəsində Bakı şəhərində bağçalara cəlb olunan uşaqların sayı 6 min nəfər artıb, təhsilin bu pilləsi üzrə əhatə səviyyəsi 26 faizi ötüb. Son 20 ildə ilk dəfə olaraq uşaq bağçaları üçün müasir tələblər səviyyəsində 137 adda təlim vəsaitləri hazırlanaraq müəssisələrə gəndərilib. Hazırda ölkədə ümumilikdə 1604 uşaq bağcası fəaliyyət göstərir. Bu bağçalarda 103617 uşaq tərbiyə olunur. Məktəbəqədər təhsil müəssisəsi olmayan yaşayış məntəqələrində yeni müəssisələrin inşası ilə bağlı isə Nazirlik tərəfindən İnvestisiya proqramı hazırlanıb.

BUGÜNƏDƏK ÖLKƏDƏ 450 MİN ŞAGİRD YERLİK 2000-DƏK YENİ MƏKTƏB İNŞA OLUNUB

Nazirin dediyinə görə, məktəblərin infrastrukturunun yeniləşdirilməsi sahəsində Heydər Əliyev Fondunun müstəsna xidmətləri olub. Fondun təşəbbüsü ilə 300-ə yaxın yeni məktəb, uşaq bağçası, uşaq evi, internat məktəbi binası tikilib istifadəyə verilib, əsaslı təmir və bərpa olunub, müasir avadanlıqlarla təchiz edilib. Yeni ümumtəhsil məktəblərinin tikintisi, əlavə korpusların inşası, onların əsaslı təmiri, müasir avadanlıqlarla təminatı, infrastrukturunun yeniləşdirilməsi nəticəsində ümumilikdə ölkə üzrə 1050000 şagirdin təlim şəraiti yaxşılaşdırılıb. Məktəb tikintisi sahəsində həyata keçirilən proqramlar sayəsində ikinövbəli məktəblərin faizi 73,3-dən 44,5-ə, ikinci növbədə təhsil alan şagirdlərin faizi isə 34-dən 21-ə enib. Bugünədək ölkədə 450-dən çox məktəb əsaslı təmir edilib. 708 ümumtəhsil məktəbi və 10 rayon təhsil şöbəsi müasir avadanlıqlarla təchiz olunub. Bakıda 301, ümumilikdə ölkə üzrə 600 məktəbin istilik sistemi təmir edilib.

İLK DƏFƏ OLARAQ YENİ KURİKULUM TƏTBİQ EDİLƏN SİNİFLƏR ÜÇÜN DƏRSLİK KOMPLEKTLƏRİ HAZIRLANIB

2008-2009-cu tədris ilində ümumtəhsil məktəblərinin 1-ci siniflərində tədrisə yeni fənn kurikulumları və müasir dərsliklərlə başlanıb, bu proses 2009-10-cu tədris ilində 1-ci və 2-ci sinifləri əhatə edib. M.Mərdanov vurğulayıb ki, yeni kurikulumların tətbiqi ilə əlaqədar 1-ci siniflərlə işləyən 9 minədək müəllim xüsusi proqram əsasında öyrədici təlim kurslarından keçib, nümunəvi tədris materialları ilə təmin edilib. Ölkənin 14 rayonunda 1-ci siniflərdə fənn kurikulumlarının tətbiqi vəziyyətinin monitorinqi aparılıb. Nazirlik tərəfindən 2010-11-ci tədris ilində 3-cü siniflərdə yeni kurikulumların tətbiqi üzrə hazırlıq işlərinin aparılması və 5-6-cı siniflər üzrə fənn kurikulumlarının hazırlanıb tətbiq olunması nəzərdə tutulub. 2009-10-cu tədris ilində Milli kurikuluma müvafiq olaraq paytaxtın 3 pilot məktəbində həndəsə və cəbrin inteqrativ proqramla riyaziyyat fənni kimi tədrisi layihəsinə başlanıb. British Council ilə Bakı şəhərinin 7 pilot məktəbində xüsusi tədris planı və proqramı əsasında ingilis dilinin intensiv tədrisi layihəsi davam etdirilir. Bu layihənin tətbiq edildiyi məktəblərin pilot siniflərdə işləyən 100-dək müəllimi Böyük Britaniyadan dəvət olunan beynəlxalq məsləhətçinin iştirakı ilə xüsusi treninqlərdən keçib. M.Mərdanovun sözlərinə əsasən, bugünədək milli-mənəvi dəyərlər əsasında müasir tələblərə uyğun məzmunda ümumilikdə 35 milyon nüsxə dərslik çap edilib. Məktəb kitabxanaları uşaq ensiklopediyaları, Azərbaycan və xarici ölkə yazıçılarının əsərləri ilə təmin edilib. Heydər Əliyev Fondunun köməkliyi ilə ayrı-ayrı fənlər üzrə 140 adda 1.4 milyon nüsxə tədris-əyani vəsait hazırlanaraq məktəblərə verilib. Bununla yanaşı orta məktəblərə 19 adda 351 min nüsxə dərslik də paylanıb. 2009-10-cu tədris ili üçün 87 adda 4256600 dərslik və müəllimlər üçün vəsait nəşr olunub və məktəblərə göndərilib. Ötən il Gürcüstanın təlimi Azərbaycan dilində olan məktəblərinə 43 adda 40270 nüsxə dərslik, Heydər Əliyev Fondu və Təhsil Nazirliyinin birgə əməkdaşlığı çərçivəsində hazırlanan 80 adda 125 komplekt tədris plakatı göndərilib. MDB ölkələrində, habelə Almaniya, Polşa, Kanada, Böyük Britaniya, ABŞ-dakı Azərbaycan dilində olan bazargünü məktəblərinə də tədris vəsaitləri göndərilib. 2010-11-ci tədris ilində 111 adda dərsliklərin və müəllim üçün vəsaitlərin çapı nəzərdə tutulub: “Dünya təcrübəsinə uyğun olaraq ölkəmizdə məktəbdaxili, milli və beynəlxalq qiymətləndirməni əhatə edən yeni qiymətləndirmə sistemi tətbiq edilmişdir. Təhsil tariximizdə ilk dəfə olaraq 2008-2009-cu dərs ilində respublikanın bütün ümumtəhsil məktəbləri və peşə liseylərində orta təhsil kursu üzrə buraxılış imtahanları mərkəzləşdirilmiş qaydada keçirilmişdir. Nəticədə mərkəzləşləşdirilmiş buraxılış imtahanlarında əla qiymətlər almış məzunların 51 faizi 2009-cu ildə ali məktəblərə qəbul imtahanlarında 500-700 bal toplamışdır. Cari dərs ilində ümumtəhsil məktəblərinin XI sinifləri ilə yanaşı, IX siniflərdə də buraxılış imtahanları mərkəzləşdirilmiş qaydada keçiriləcək”.

2009-cu ilin may ayında ölkənin 52 rayon və şəhərinin 216 məktəbində 11822 şagird əhatə olunmaqla, ana dili və riyaziyyat fənləri üzrə Milli qiymətləndirmənin tədqiqat mərhələsi keçirilib. Tədqiqat ərəfəsində aparılan sorğularda 216 məktəb direktoru, 616 ana dili və riyaziyyat müəllimi, 1009 valideyn iştirak edib. Beynəlxalq qiymətləndirmə sahəsində də tədbirlər görülmüş, ötən ilin aprel-may aylarında ölkənin 162 məktəbinin 15 yaşlı 4716 şagirdi əhatə olunmaqla PISA – 2009-un əsas mərhələsi keçirilib. TIMSS-2011 və PIRLS-2011 proqramlarının həyata keçirilməsi üçün hazırlıq işləri yekunlaşdırılıb.

KADR TƏMİNATI SAHƏSİNDƏ 2005-2009-CU İLLƏRİ ƏHATƏ EDƏN PROQRAM BAŞA ÇATDIRILIB

M.Mərdanov deyir ki, bu il 1308 nəfər müəllim stimullaşdırıcı tədbirlər tətbiq edilməklə ucqar kənd məktəblərinə göndərilib. Ölkənin ümumtəhsil məktəblərinə müəllimlərin işə qəbulu sahəsində yeni mexanizmlərin tətbiqinə başlanılıb. Bakı şəhərində müəllimlərin işə qəbulu elektron vasitələr əsasında iki mərhələli müsabiqə mexanizmi tətbiq olunmaqla həyata keçirilib. Həyata keçirilən tədbirlər nəticəsində ölkə üzrə müəllimlərin sayı 173 mindən 170 minə enib. Nazirin fikrincə, hazırda bölgələrdə kadr çatışmamazlığı problemi deyil, müəllimin artıqlığı problemi mövcuddur. Bu il ölkənin orta məktəblərində pedaqoji kadr təminatı vəziyyətinin monitorinqinin aparılması və yeni təkliflərin hazırlanması planlaşdırılır. Həmçinin hazırda işləyən müəllimlərin və rəhbər pedaqoji işçilərin peşəkarlıq səviyyəsinin qiymətləndirilməsi üzrə mexanizmin hazırlanıb tətbiq edilməsi planlaşdırılır.

46 DÖVLƏT UŞAQ MÜƏSSİSƏSİNDƏ 10054 NƏFƏR TƏRBİYƏ ALIR

Bu uşaqların 3960 nəfəri müəssisədə gecələyir, 6094 nəfəri isə müəssisədə yalnız təhsil alır, gecəni isə ailəsi ilə birlikdə keçirir. Ötən il “Azərbaycan Respublikasında dövlət uşaq müəssisələrindən uşaqların ailələrə verilməsi (De-institusionalizasiya) və alternativ qayğı Dövlət proqramı” çərçivəsində dövlət-uşaq müəssisələrin transformasiyası üzrə baş plan hazırlanıb. Plana əsasən 9 ümumtəhsil internat məktəbi ümumtəhsil məktəblərinə çevrilib və dövlət uşaq müəssisələrinin sayı 55-dən 46-ya enib. Sosial cəhətdən çətin vəziyyətdə olan ailələrin və sağlamlıq imkanları məhdud uşaqların rifahının yaxşılaşdırılması, onların cəmiyyətə inteqrasiyası, təhsilə cəlb edilməsinin təşkili məqsədilə Bərdə, Suraxanı, Əzizbəyov və Sabunçu rayonlarında günərzi qayğı və reabilitasiya-inkişaf mərkəzləri yaradılıb. Mərkəzlərin binaları əsaslı təmir edilib, inkişafetdirici təlim materialları, reabilitasiya yönümlü avadanlıqlarla təmin edilib.

BU İL 4000 ŞAGİRDƏ PULSUZ NOUTBUK VERİLƏCƏK

2008-09-cu tədris ilində IX və XI sinfi bitirən şagirdlərə verilən şəhadətnamə və attestatların seriyaları və nömrələri TİMS məlumat bazasına daxil edilib. Nazir bildirib ki, 500 təhsil müəssisəsi Azərbaycan Təhsil Şəbəkəsinə (İntranet) və İnternet şəbəkəsinə qoşulub, onların yüksək sürətli internetə çıxışı təmin edilib, inzibati, pedaqoji və texniki heyət əhatə olunmaqla 40 min nəfər müvafiq treninqlərdən keçərək İKT bacarıqlarına yiyələnib. Cari ildə 25000 nəfər ali və orta təhsil müəssisələrinin pedaqoji, 4000 nəfər inzibati-idarəetmə və 500 nəfər texniki heyətin İKT üzrə treninqlərdən keçirilməsi, daha 500 məktəbin yüksək sürətli internetə qoşulması nəzərdə tutulub, Bakı şəhərinin 20 məktəbində “Elektron məktəb” pilot layihəsi davam etdirilib, həmin məktəblərə 336 netbuk və CİSCO şəbəkə avadanlığı verilib. Ölkə üzrə təhsil müəssisələri 300 yeni NEXSUS markalı personal kompüter, 200 noutbuk və 200 LCD proyektorla təchiz olunub. Mingəçevir, Şəki, Masallı, Qazax, Sabirabad rayon ümumtəhsil məktəbləri 226 dəst kompüterlə təchiz edilib. Məktəblərə verilən kompüterlər üçün 32 min lisenziyalı proqram təminatı alınıb. “Xalq kompüteri” layihəsi çərçivəsində 5000 müəllim kompüterlə təmin olunub. 2009-10 tədris ili üçün TİMS elektron məlumat bazasının yeniləşdirilməsi, IX və XI sinfi bitirəcək şagirdlərə veriləcək şəhadətnamə və attestatların seriyaları və nömrələrinin TİMS məlumat bazasına daxil edilməsi planlaşdırılır. Məktəbəqədər, orta ixtisas, ali təhsil pillələri və təhsil şöbələri üzrə TİMS bazasının yaradılması, TİMS serverinin Vahid Təhsil Şəbəkəsinə qoşulması və “Təhsil sisteminin informasiyalaşdırılması Dövlət Proqramı” çərçivəsində internet şəbəkəsində birləşdirilən 500 məktəbdən məlumatların on-line rejimində toplanılması nəzərdə tutulub. Bu il ərzində həmçinin İntel şirkəti tərəfindən 1000, nazirlik tərəfindən isə 3000 olmaqla ümumilikdə 4 000 şagirdə noutbuk veriləcək.

ÖTƏN İL 3 PEŞƏ TƏHSİLİ MÜƏSSİSƏSİ ƏSASLI TƏMİR OLUNUB

Hazırda ölkədə 108 texniki-peşə təhsili müəssisəsi fəaliyyət göstərir. Bu müəssisələrdə 25 200 şagird təhsil alır. M.Mərdanovun söylədiyinə görə, 2009-10-cu dərs ilində Qəbələ Turizm və Otelçilik üzrə Peşə Tədris Mərkəzinə 90 şagird qəbul edilib və turizm, otelçilik peşələri üzrə kadr hazırlığına başlanıb. Texniki peşə təhsilini əhatə edən məlumat bazası və www.vet.edu.gov.az saytı yaradılıb. Heydər Əliyev Fondu, Təhsil Nazirliyi və UNESCO-nun birgə həyata keçirdiyi “Peşə təhsilinin təkmilləşdirilməsi layihəsi” çərçivəsində “otel nəzarətçisi” və “kompüter üzrə operator” ixtisasları üzrə kurikulumların ilkin variantı hazırlanıb. Son 20 ildə müxtəlif peşələr üzrə ilk dəfə olaraq 7 adda dərslik hazırlanıb. Bütün peşələr üzrə 32 adda 1222 dəst müasir tələblər səviyyəsində yeni əyani vəsaitlər çap olunub müəssisələrə çatdırılıb. Bu il Dövlət Proqramı çərçivəsində İsmayıllı rayonunda Turizm və Otelçilik üzrə Peşə Tədris Mərkəzinin tikintisi, müəssisələrin maddi-texniki bazasının gücləndirilməsi işinin davam etdirilməsi, Turizm, İKT, inşaat və nəqliyyat sahələri üzrə müəyyən edilən ixtisaslar üzrə standartların hazırlanması planlaşdırılır. Bununla yanaşı yeni ixtisas klassifikatorunun, məzunların bacarıqlarının əmək bazarının tələblərinə müvafiq qiymətləndirilməsi məqsədilə yeni qiymətləndirmə mexanizminin hazırlanması nəzərdə tutulub.

ÖLKƏDƏ 61 ORTA İXTİSAS TƏHSİLİ MÜƏSSİSƏSİ FƏALİYYƏT GÖSTƏRİR

Bu müəssisələrdən 57 dövlət 4-ü özəl orta ixtisas təhsili müəssisələridir. Ümumilikdə bu müəssisələrdə 52765 şagird təhsil alır. Müəllimlərin sayı isə 7165-dir. Nazir qeyd edib ki, ötən il Mingəçevir və Gəncə Tibb məktəbləri, Lənkəran Dövlət Humanitar Kolleci, Ağcabədi Pedaqoji və Dövlət Dəniz Balıq Sənayesi Texnikumları akkreditə olunub. Orta ixtisas təhsili müəssisələri tələbələrinin biliyinin çoxballı sistemlə qiymətləndirilməsinin əhatə dairəsi genişləndirilib. “Azərbaycanda ali və orta ixtisas musiqi təhsilinin İnkişaf Proqramı”nın layihəsi hazırlanıb və təsdiq üçün hökumətə təqdim edilib. “Təhsil haqqında” Qanuna uyğun olaraq orta ixtisas təhsili ilə bağlı hüquqi-normativ sənədlər hazırlanıb və təsdiq üçün Nazirlər Kabinetinə təqdim edilib. Bu il orta ixtisas təhsili müəssisələrində semestr imtahanlarının mərkəzləşdirilmiş qaydada test üsulu ilə keçirilməsinin əhatə dairəsinin genişləndirilməsi, təhsildə fasiləsizliyi təmin etmək üçün orta ixtisas təhsilinin digər təhsil pillələri və səviyyələri ilə qarşılıqlı fəaliyyəti üçün tədbirlərin həyata keçirilməsi nəzərdə tutulub. Həmçinin istehsalatın müvafiq sahələrində kifayət qədər təcrübəsi olan mütəxəssislərin orta ixtisas məktəblərinə cəlb edilməsi, bütün orta ixtisas təhsili müəssisələrində tələbələrin biliyinin çoxballı sistemlə qiymətləndirilməsinin tətbiq edilməsi planlaşdırılır.

Hazırda ölkədə 37 dövlət və 16 özəl ali təhsil müəssisəsi fəaliyyət göstərir. Dövlət təhsil müəssisələrində ümumilikdə 117934, özəl ali məktəblərdə 21260 tələbə təhsil alır. Dövlət müəssisələrində 12813, özəl məktəblərdə isə 2120 müəllim çalışır. Ötən il akademik borcların ləğv edilməsinə şərait yaradılması məqsədilə ölkədə

İLK DƏFƏ OLARAQ 8 ALİ MƏKTƏBDƏ YAY SEMESTRİ TƏŞKİL EDİLİB

M.Mərdanov əlavə edib ki, ötən il ali təhsilin bakalavr səviyyəsi ixtisaslarının siyahısı hazırlanıb və Nazirlər Kabineti tərəfindən təsdiq edilib. Əvvəlki siyahıdakı 515 ixtisas əvəzinə təsdiq olunan yeni siyahıda ixtisas qrupları üzrə 149 ixtisas saxlanılıb. Ali məktəblərin reytinqini müəyyənləşdirən mexanizmin tətbiqi, ali təhsil müəssisələrinin akkreditasiya qaydalarının təkmilləşdirilməsi, “Təhsil haqqında” Qanunun tələblərinə uyğun olaraq ali məktəblərin fəaliyyətini tənzimləyən yeni normativ-hüquqi sənədlərin hazırlanması nəzərdə tutulub. Magistr hazırlığının məzmununa və səviyyəsinə qoyulan minimum dövlət tələblərinin strukturunun təsdiq edilməsi, buna müvafiq olaraq ixtisaslaşmalar üzrə yeni nəsl dövlət təhsil standartlarının hazırlanması, ali məktəblərdə təlim prosesinin tədris-metodiki təminatı işinin təkmilləşdirilməsinin davam etdirilməsi həyata keçirilməsi nəzərdə tutulan işlərdəndir. Eyni zamanda Boloniya Bəyannaməsinin tələblərini təmin edən yeni tədris-metodik vəsaitlərin hazırlanması, ali təhsil müəssisələrində qiymətləndirmə mərkəzlərinin yaradılması planlaşdırılıb.

TƏHSİL SAHƏSİNDƏ AYRI-AYRI ÖLKƏLƏRLƏ İKİTƏRƏFLİ ƏMƏKDAŞLIQ ÇƏRÇİVƏSİNDƏ 8 SAZİŞ VƏ PROTOKOL İMZALANIB

Nazir deyib ki, ötən il Azərbaycanın ABŞ, Suriya, İran, İsrail, İordaniya, Malayziya, Cənubi Koreya, Belarus, Almaniya, Litva kimi ölkələrlə təhsil sahəsində əməkdaşlıq əlaqələri genişlənib. İranla iqtisadi, ticarət, humanitar sahələrdə əməkdaşlıq üzrə memorandum, İsrail, Kabardin-balkar Respublikası arasında mədəniyyət, təhsil, elm sahəsində əməkdaşlıq haqqında saziş, Təhsil Nazirliyi və ABŞ-ın Beynəlxalq Təhsil İnstitutu arasında İnzibati Xidmət Müqaviləsi, Suriyanın Ali Təhsil Nazirliyi arasında ali, ümumi təhsil sahəsində əməkdaşlıq sazişi, İordaniya Haşimilər Krallığının Tərbiyə və Təhsil Nazirliyi arasında təhsil sahəsində əməkdaşlıq haqqında niyyət protokolu imzalanıb. Bu il beynəlxalq təşkilatlarla təhsil sahəsində əməkdaşlığın genişləndirilməsi prosesi davam etdiriləcək. Avropa İttifaqı, Avropa Şurası, UNESCO, İSESCO, BMT kimi nüfuzlu beynəlxalq təşkilatlarla birgə layihələrin, Avropa İttifaqının Twinning, TAİEX və Siqma alətləri çərçivəsində layihələrin, Erasmus-Mundus Proqramı çərçivəsində layihələrin həyata keçirilməsi, xarici ölkələr, beynəlxalq təşkilatlarla təhsil sahəsində imzalanmış saziş, protokolların səmərəli şəkildə həyata keçirilməsi nəzərdə tutulub. Ötən il “2007-2015-ci illərdə Azərbaycan gənclərinin xaricdə təhsili üzrə Dövlət Proqramı” çərçivəsində dünyanın 23 ölkəsinə təhsil almağa göndərilənlərin sayı 498-ə çatdırılıb. Dövlət proqramı çərçivəsində xaricdə təhsil alanların 23 faizi tibb, 20 faizi iqtisadiyyat, 14 faizi isə texniki və mühəndislik elmləri təşkil edib. Bu il Proqram çərçivəsində seçilən ali təhsil müəssisələrinin və müvafiq ixtisasların siyahısının yeniləşdirilməsi ilə əlaqədar təkliflərin hazırlanması planlaşdırılır.

2009-cu İLDƏ ALİ MƏKTƏB ALİMLƏRİNİN İXTİRALARINA 69 PATENT AYRILIB

Nazirin dediyinə görə, ali məktəb əməkdaşları tərəfindən 2009-cu ildə 33 doktorluq, 145 namizədlik dissertasiyası müdafiə olunub. Ali məktəblərdə çalışan alimlər tərəfindən 323 monoqrafiya, 308 dərslik, 522 dərs vəsaiti, 1285 adda proqram və metodik ədəbiyyat dərc etdirilib.

İl ərzində xarici jurnallarda alimlərin 1736 məqaləsi, beynəlxalq konfransların materiallarında 1279 məruzə tezisi nəşr olunub. Bununla yanaşı ötən il ali məktəblərdə yeni elmi-tədqiqat müəssisələri, o cümlədən, İqtisad Universitetində İqtisadi Araşdırmalar Elmi-Tədqiqat İnstitutu, Bakı Dövlət Universitetində “Jurnalistika”, Turizm Universitetində “Nanostrukturların fizikası və texnikası” elmi – tədqiqat laboratoriyası və “Maşınşünaslıq” Elmi-Tədqiqat Mərkəzi yaradılıb. Aspirantların və gənc tədqiqatçıların XIII Respublika elmi konfransı, “Ən yaxşı tələbə elmi-tədqiqat işi” müsabiqəsi, ali məktəb tələbələrinin XIV Respublika fənn olimpiadası, doktorantların və gənc tədqiqatçıların XIV Respublika elmi konfransı keçirilib. Bu il isə ali məktəblərdə fəaliyyət göstərən elmi-tədqiqat müəssisələrində aparılan elmi-tədqiqat işlərinin və mövzuların monitorinqinin aparılması, texnoparkların yaradılmasına dair əsasnamənin, təkliflərin hazırlanması, elmi tədqiqat institutlarında, istehsalatda ali məktəblərin bazalarının yaradılması, elmi və elimi-pedaqoji kadr hazırlığı ixtisaslarının beynəlxalq təşkilatların qəbul etdiyi elmi ixtisas siyahılarına uyğunlaşdırılması barədə təkliflərin hazırlanması, ali məktəblərdə elektron kitabxanaların təşkili, universitetlərdə fəaliyyət göstərən elmi-tədqiqat institutları, elmi kitabxanalar üçün müasir standartlara cavab verən binaların tikilməsi ilə əlaqədar təkliflərin hazırlanması planlaşdırılır.

Sevinc QARAYEVA

525-ci qəzet.- 2010.- 1 fevral.- S.6.