Rafiq Şamiloğlunun “Bəlalı dünya”sı təqdim edilib

Yazıçılar Birliyində (AYB) Rafiq Şamiloğlunun “Bəlalı dünya” adlı yeni kitabının təqdimatı keçirilib. Bu barədə AYB-nin mətbuat xidmətindən məlumat verilib. Tədbirdə çıxış edən AYB-in katibi, xalq şairi Fikrət Qoca, şairlər İlyas Tapdıq, Oqtay Rza, Musa Ələkbərli, yazıçılar Xeyrəddin Qoca, Elçin Hüseynbəyli, Zemfira Məhərrəmli, əməkdar rəssam Adil Rüstəmov və başqaları R.Şamiloğlunun yaradıcılığından, əsərlərində öz əksini tapan milli təəssübkeşlik ruhundan, vətənpərvərlik hisslərindən söz açıblar: “On iki kitab müəllifi olan yazıçının “Bəlalı dünya” əsəri iyirmi ildən bəri xalqımızın zorla sürükləndiyi Qarabağ müharibəsinin dəhşətlərindən bəhs edir. Əsərdə müəllif hələ XX əsrin əvvəllərindən başlayaraq torpağımızda qırğınlar törədən xəyanətkar erməni millətçilərinin iç üzünü açmağa çalışıb. “Bəlalı dünya” erməni yalanlarını üzə çıxaran layiqli əsərdir”. Təqdimat mərasimində yazıçının sənət dostları Əhməd Məmmədov, Hafiz Hüseynxanlı və başqaları R.Şamiloğlunun həm yazıçı, həm də insan kimi daşıdığı keyfiyyətlərdən danışıblar.

SARA

525-ci qəzet.- 2010.- 19 fevral.- S.7.