Rəssamlıq Akademiyasında “Daş, Kağız, Qayçı” sərgilənir

Dünən Azərbaycan Rəssamlıq Akademiyasında “Daş, Kağız, Qayçı” adlı incəsənət sərgisinin açılışı olub. “British Council” ilə Mədəniyyət və Turizm Nazirliyinin dəstəyi sayəsində açılan sərgidə giriş sözüylə Rəssamlıq Akademiyasının prorektoru Səlhab Məmmədov çıxış edərək, fikirlərini bölüşüb: “Rəssamlıq Akademiyasına yığışmaqda məqsədimiz “British Council”ın zəngin və mükəmməl incəsənət kolleksiyasına daxil olan əsərləri sərgi iştirakçılarına təqdim etməkdir. Dünya səviyyəli bu sərginin Rəssamlıq Akademiyasında açılması olduqca sevindirici haldır. “British Council” Türkiyə, Ukrayna, Gürcüstan və digər ölkələrdə sərgilərin təşkilinə öz töhfəsini verir. Bu ölkələrdə bir sıra simpoziumlar da həyata keçirilib. Ümidvarıq ki, bizdə də, Akademiyanın tələbələri ilə bərabər belə simpoziumlar təşkil edə biləcəyik”.

Mədəniyyət və turizm nazirinin müavini Sevda Məmmədəliyeva çıxışında “British Council”ın ölkəmizin mədəni həyatında iştirakından məmnunluğunu dilə gətirib: “British Council” Azərbaycanda fəaliyyətə başladığı gündən bəri çox mühüm işlər görüb. Teatr, musiqi və incəsənətin digər sahələrilə bağlı tədbirlərə dəstək verib. Hazırda nümayiş olunan sərgidə sənətsevərlərimiz dünyanın məşhur sənətkarlarının əsərləri ilə tanışlıq imkanı qazanıblar”.

Professor Ömər Eldarov tədbirə böyük məmnuniyyətlə qatıldığını, təqdim olunan əsərlərin sənətkarlıq xüsusiyyətlərilə diqqəti çəkdiyini qeyd edib.

“British Council”ın Cənubi Qafqaz regionu üzrə direktoru Pol Dabldey sərgidə nümayiş olunan əsərlərin müəllifləri və onların yaradıcılığı barədə məlumat verib: “Sərgidə Demian Hirst, Treysi Emin, Aniş Kapur, Mayk Nelson, Anya Qalasio, Eduardo Paolozzi və Vilyam Törnbul kimi mahir rəssamların əsərləri yer alıb. Bu rəssamlar Britaniya incəsənət tarixində öz imzalarını qoymuş sənətkarlardır”.

P.Dabldey sərginin xidmət etdiyi məramlardan da söz açıb: “Əsas məqsədimiz insanlarda, xüsusən də tələbələrdə müasir incəsənət nümunələrinə marağı artırmaq və onlardan bəhrələnə bilmələrinə dəstək verməkdir”.

Sərginin nümayişi fevralın sonuna qədər davam edəcək.

Hüsniyyə İSMƏTQIZI

525-ci qəzet.- 2010.- 23 fevral.- S. 7.