Musiqili Komediya Teatrında Yaradıcılıq Studiyası fəaliyyətə başlayıb

Bu barədə teatrın mətbuat xidmətindən qəzetimizə verilən məlumatda deyilir. Yaradıcılıq Studiyası ölkə prezidentinin “Azərbaycan teatr sənətinin inkişaf etdirilməsi haqqında” 19 fevral 2007-ci il tarixli 1964 nömrəli sərəncamına və “Azərbaycan teatrı 2009-2019-cu illərdə Dövlət Proqramı”na uyğun olaraq yaradılıb. Studiyanın yaranmasında əsas məqsəd milli teatr mədəniyyətinin təbliği, teatra kütləvi marağı artırmaqla teatr sənətinə maraq göstərən, xoreqrafiya, vokal, aktyorluq və musiqi ifaçılığı sahəsində xüsusi bacarığı olan, 6 yaşından başlayaraq, uşaqları və istedadlı gəncləri teatra cəlb etməkdir.

Yaradıcılıq Studiyasının təqdimat mərasimi bu il mart ayının 4-də olacaq. Studiyanın teatr bölməsində məşğul olan gənclər dramaturq Əmir Pəhləvanın “İstədiyim yar idi...” komediyası ilə ilk addımlarını atacaqlar. Rəqs bölməsində məşğələlərdə iştirak edən azyaşlı uşaqlar və yeniyetmələr milli və klassik rəqslərlə tamaşaçılar qarşısına çıxacaqlar.

Studiyanın rəhbəri Əminə Musayeva bizimlə söhbətində tanınmış səhnə ustalarının rəhbərliyi ilə çalışacaq uşaqların yaxın vaxtlarda daha böyük işlərlə tamaşaçıları sevindirəcəklərini bildirdi.

Teatrın direktoru, əməkdar incəsənət xadimi Əliqismət Lalayevin sözlərinə görə, musiqili teatr sənəti başqa səhnə janrlarından onunla fərqlənir ki, burada çalışan aktyorlar həm gözəl rəqs etməyi, həm oxumağı bacarmalı, həm də yetərincə aktyorluq imkanlarına malik olmalıdır: “Amma çox təəssüf ki, çox zaman ölkənin peşəkar musiqili teatrlarında buna nail ola bilmirik. Düşünürəm ki, bu uşaqlar saydığım səhnə vərdişlərinə lazımınca yiyələnəcəklər. Səhnə sənətini özlərinə peşə seçənlər, ümidvarıq ki, ilk öncə bizim teatra maraq göstərəcəklər. Musiqini, rəqs və ifaçılığını xobbi kimi qəbul edənlər isə səviyyəli tamaşaçı olacaqlar. Bu gün teatrlarımızın belə tamaşaçılara böyük ehtiyacı var. Qeyd edim ki, Dövlət Musiqili Komediya Teatrının Yaradıcılıq Studiyası həm də Mədəniyyət və Turizm Nazirliyinin tövsiyəsi ilə yaradılıb. Bu, 100 yaşlı teatrımıza, onun kollektivinə və daimi tamaşaçılarına əvəzsiz hədiyyədir.

Hüsniyyə İSMƏTQIZI

525-ci qəzet.- 2010.- 23 fevral.-S.7.