“Muğam axşamları”na start verilib

“Şirvanşahlar Sarayı Kompleksi” Dövlət Tarix-Memarlıq Qoruq-Muzeyində “Muğam axşamları” adlı yeni layihənin açılışı olub. Layihə “İçərişəhər” Dövlət Tarix-Memarlıq Qoruğu İdarəsinin təşkilati və informasiya dəstəyi ilə həyata keçirilir. İyirmi həftə ardıcıl təşkil olunacaq “Muğam axşamları”ndan ibarət silsilədə gənc xanəndələr bir-birindən maraqlı konsert proqramları ilə çıxış edəcəklər.

“Muğam axşamları”nın açılış mərasimində çıxış edən mədəniyyət və turizm nazirinin müavini Sevda Məmmədəliyeva, “İçərişəhər” Dövlət Tarix-Memarlıq Qoruğu İdarəsi rəisinin müavini Samir Nuriyev və Açıq Cəmiyyət İnstitutu-Yardım Fondunun incəsənət və mədəniyyət proqramlarının əlaqələndiricisi Cahangir Səlimxanov son illər Azərbaycanda muğam sənətinin inkişafı və təbliği ilə bağlı görülmüş işlərdən, həyata keçirilən mühüm layihələrdən söz açıblar: “Bu layihə 2007-2008-ci illərdə YUNESKO-nun, respublikamızın Mədəniyyət və Turizm Nazirliyinin, Yaponiya hökumətinin dəstəyi ilə Beynəlxalq Musiqi Şurasının Azərbaycan Milli Komitəsi tərəfindən icra olunan “Əbədi muğam“ layihəsi çərçivəsində “Şirvanşahlar Sarayı Kompleksi”ndə keçirilən həftəlik muğam konsertləri silsiləsinin davamıdır”. Çıxış edənlər Azərbaycan musiqisinin, eləcə də muğamlarımızın dünyada tanıdılması, tədqiqi və təbliği istiqamətində Heydər Əliyev Fondunun prezidenti, millət vəkili Mehriban Əliyevanın gördüyü məqsədyönlü işləri xüsusi qeyd ediblər: “İçərişəhər və muğam YUNESKO-nun dünya mədəni irs siyahısına daxil edilmiş dəyərlərdir. Bu mənada keçirilən muğam axşamları həm musiqisevərlər, həm də Azərbaycanın tarixi ilə maraqlananlar üçün dəyərli töhfədir”.

Açıq Cəmiyyət İnstitutu-Yardım Fondu və “Mugamradio” internet radiokanalının təşkilati dəstək verdikləri konsertlər silsiləsi xanəndə Ehtiram Hüseynovun ifasında “Rast” muğamı ilə başlayıb. Onu Elşən və Malik Mansurovlar müşayiət ediblər.

SARA

525-ci qəzet.- 2010.- 26 fevral.- S. 7.