Xocalı şəhidləri Yazıçılar Birliyində yad edilib

Xocalı soyqırımının 18-ci ildönümü ilə əlaqədar Azərbaycan Yazıçılar Birliyində (AYB) anım mərasimi keçirilib. AYB-nin birinci katibi, xalq şairi Fikrət Qoca Xocalı soyqırımının Azərbaycan xalqının unudulmaz dərdi olduğunu qeyd edib: “Ermənilərin bu vəhşilik aktını əlimizdən gəldiyi qədər bütün dünyaya çatdırmalıyıq. Biz yazıçıların boynuna düşən vəzifə bu tarixi faciəmiz haqqında əsərlər yazıb, kitab halında gələcək nəslə çatdırmaqdır”. F.Qoca Rafael Tağızadənin, Eyvaz Zeynalovun, eləcə də digər şair və yazıçıların Xocalı soyqırımına, Qarabağ hadisələrinə həsr etdikləri əsərlərdən söz açıb. Xalq şairi azərbaycanlılara qarşı törədilən cinayətləri doğlun və təsirli əsərlər, sanballı nəşrlərlə dünya xalqlarına çatdırmağın zəruri olduğunu bildirib. Yazıçı-publisist Xeyrəddin Qoca çıxışında Xocalı soyqırımını ildə bir dəfə deyil, hər zaman xatırlamağın vacibliyini vurğulayıb: “Artıq bu faciəni əlimizdə olan əsaslı faktlarla dünyaya çatdırmağın ən optimal yolunu taparaq, bu sahədə təsirli işlər görmək lazımdir”. Şair Ramiz Məmmədzadə Xocalı hadisəsinin qurbanlarını öz gözlərilə gördüyünü önə çəkib: “Faciə baş verəndə Ağdama getmişdim. Erməni vəhşiliyinə məruz qalan cəsədləri gözümlə görmüşəm. Hazırda ekranlarda göstərilən kadrlar Çingiz Mustafayevin Xocalıda lentə aldığı üç kasetin montaj olunmuş hissəsidir. O kasetlərdə elə dəhşətli görüntülər var idi ki, şəxsən mən o kadrlara sona qədər baxa bilməmişdim”. AYB-nin mətbuat katibi, şair Ədalət Əsgəroğlu bu qətliamın dünya miqyasında görünməmiş bir cinayət olduğunu diqqətə çatdırıb: “Biz bu və digər faciələrimizi, onların qurbanlarını həmişə ehtiramla xatırlamalı, cinayətkarların cəzalandırılmasını beynəlxalq aləmdən tələb etməliyik”. Tədbirdə şairlər Qəşəm Nəcəfzadə, Oqtay Rza, Fərqanə Mehdiyeva Xocalı şəhidlərinin xatirəsinə həsr etdikləri şeirləri oxuyublar.

Günel MUSAYEVA

525-ci qəzet.- 2010.- 27 fevral.- S. 19.