İran musiqiçiləri Bakıda konsert veriblər

Beynəlxalq Muğam Mərkəzində İran müğənnisi Mohtabadın və “Rudaki” musiqi qrupunun konserti olub. Tədbirdə İranın Azərbaycandakı səfiri Məmmədbaqir Bəhrami və Bakıda səfərdə olan İran İslam Respublikasının Mədəniyyət və İslam maarifləndirilməsi naziri Seyid Məhəmməd Hüseyni çıxış edərək ölkələrimiz arasındakı əlaqələri yüksək qiymətləndiriblər. Mərasimdə mədəniyyət və turizm naziri Əbülfəs Qarayev çıxışında, ölkələrimiz arasında əməkdaşlığın genişlənməsində qarşılıqlı mədəni əlaqələrin mühüm rolunu vurğulayıb. Belə görüşlərin və tədbirlərin Azərbaycan ilə İran arasında tarixi dostluq əlaqələrinin daha da gücləndirilməsinə xidmət edəcəyini bildirən nazir cari ildə İranda Azərbaycan Mədəniyyəti Günlərinin keçiriləcəyini diqqətə çatdırıb. İran musiqiçilərinin çıxışı tamaşaçılar tərəfindən böyük maraqla qarşılanıb. Mərkəzin foyesində İranın tarixi keçmişini özündə əks etdirən fotosərgi açılıb və bu ölkədə son illərdə çap edilən kitablar nümayiş olunub.

525-ci qəzet.- 2010.- 8 iyul.- S.4.