Erməni yalanına daha bir zərbə

Moskvada “Flint” nəşriyyatı tərəfindən tanınmış Azərbaycan jurnalisti, “İrs-Nasledie” beynəlxalq jurnalının baş redaktoru Musa Mərcanlının “Erməniçilik. Rusiya.Qafqaz” adlı kitabı işıq üzü görüb. Musa Mərcanlının oxucuların mühakiməsinə təqdim etdiyi bu elmi-tarixi nəşrdə ermənilərin Rusiya və Cənubi Qafqazın yerli xalqlarıyla qarşılıqlı münasibətlərindən və onların zaman-zaman qarşılaşdıqları, əlaqədə olduqları bu etnosları və əraziləri erməniləşdirmək cəhdlərindən bəhs edir. Müəllif bu kitabın ərsəyə gəlməsi üçün arxiv materiallarından istifadə edərək nəhəng təhqiqat işləri aparıb. Musa Mərcanlı əksəriyyəti erməni, rus və digər əcnəbi qaynaqlar olmaqla 200-dən artıq mənbəyə istinad edib. Kitabda dəlillərlə təsdiqlənir ki, ermənilər harada yaşamalarından asılı olmayaraq, oranı Ermənistan kimi təqdim edir. Bunun üçün bu gün 26 “Ermənistan” kimi məşhur olan şərqə istiqamətlənmiş marşrutları qeyd etmək kifayətdi. Bu mənada, aydın olur ki, erməni tarixçiləri Ermənistanın yox, erməni xalqının tarixini qələmə alırlar. “Amma ermənilərin uzun müddətə, yaxud həmişəlik müəyyən bir ərazidə dövlət kimi mövcud olmaq cəhdləri baş tutmadı. Çünki onlar həmişə, hər yerdə indiki kimi etnik azlıq olaraq qalırdı”. Bu iqtibas C.Makkartinin “Türklər və ermənilər. Erməni məsələsinə istinadən” kitabından götürülüb. Daha sonra kitabda qeyd olunur ki, erməni icması məskunlaşdıqları ölkələrə müəyyən təsir göstərmək gücündə olsalar da, həmin ölkələrin statusunu heç cür dəyişə bilməzdilər. Musa Mərcanlı kitabında qeyd edir: “Bu aspektdə erməni icmasının son ümid yeri Rusiya və Qafqaz idi. Bunun aqibəti isə Qafqazın və orada yaşayan xalqların tarixindən yaxşı məlumdur. Bu, həmçinin erməni xalqının öz qonşularıyla müxtəlif sahələrdəki şaquli və üfüqi, müxtəlif siyasi, mədəni, konfessional, sosial, iqtisadi, etnik səviyyələrdəki çoxqütblü əlaqələrindən də bəllidi”. Kitabda XX əsrin əvvəllərində Qafqazda köç salan xalqlar barədə maraqlı rəqəmlər gətirilir ki, burda da ermənilər üstünlük təşkil edir. Elmi-tarixi əsər bu başlıqlarla təqdim olunur: “Ermənilər və Rusiya”, “Rusiya üçün ermənilərin Qafqazdakı rolu və əhəmiyyəti”, “Erməni icmasının Qafqazda “Böyük Ermənistan” mifologemini gerçəkləşdirmək cəhdi”, “Erməni icmasının Qarabağ sindromu: tarixi öncəliklər və gerçəkliklər”, “Erməni-gürcü kolliziyası” və “Nədən ermənilər qafqazlı deyillər”. Qeyd edək ki, bu, Musa Mərcanlını 2009-cu ildə Sankt-Peterburqda dərc olunan “Qarabağ məsələsi və geosiyasət: analitik baxış” adlı kitabının davamıdı. Bu elmi-tarixi nəşrin tarixçilər, beynəlxalq münasibətlər üzrə mütəxəssislər, həmçinin geniş oxucu kütləsi üçün böyük maraq kəsb edəcəyi şəksizdi. Kitabı “Ozon.ru” və “Setbook.ru” internet mağazalarından əldə etmək olar.

GÜNDÜZ

525-ci qəzet.- 2010.- 17 iyul.- S.16.