Yeniyetmələr üçün “Həyat bacarıqları” proqramı təqdim olunub

Dünən Bakıda Uşaqların Xilası Təşkilatı (Save the Children) və “Ümidli gələcək” təşkilatının birgə təşəbbüsü ilə yeniyetmələr üçün “Həyat bacarıqları” proqramının təqdimat mərasimi keçirilib. Tədbirdə çıxış edən uşaqların Xilası Təşkilatının Azərbaycan üzrə direktoru Corc Ciakomini bildirib ki, proqramın həyata keçirilməsində Gənclər və İdman Nazirliyi və Avropa Birliyi və “Statoil” şirkəti isə proqramın həyata keçirilməsinə dəstək verirlər. O, internatlardan buraxılan uşaqların gələcəkdə işlə təmin olunması üçün özəl sektoru canlandırmağın vacib məsələ olduğunu deyib. Onun sözlərinə görə, proqramın məqsədi yerli QHT-lərlə əlaqələr vasitəsi ilə diqqət və qayğıdan kənar qalmış gənclərin ehtiyaclarına xidmət etməkdən ibarətdir. Proqram Azərbaycanın 5 rayonunda 14-17 yaş arası olan 3 min gənci əhatə edəcək. Avropa Birliyinin Azərbaycandakı nümayəndəliyinin rəhbəri Roland Kobra qeyd edib ki, hazırda Birlik cəmiyyətdə olan sosial bərabərsizliyi aradan qaldırmağa çalışdıqlarını deyib. Onun sözlərinə görə, həyati cəmiyyətin inkişafı çətin bir prosesdir, amma bu istiqamətdə davamlı olaraq addımlar atılır. Yeniyetmələr üçün Həyat bacarıqları proqramının rəhbəri Bahar Arabova isə vurğulayıb ki, “Save the Children” təşkilatı bu vaxta qədər internat məktəbləri və uşaq evlərində yaşayan, sağlamlıq imkanları məhdud olan uşaqlarla bağlı bir çox proqram və layihə həyata keçirib. Təşkilat Azərbaycanın 11 rayonunda Uşaq və Ailələrə Dəstək Mərkəzlərini yaradaraq hökumətə təhvil verib. Bu gün həmin mərkəzlərə minlərlə uşaq, ailələr müraciət edir və zəruri xidmətlər alırlar. “Ümidli Gələcək” təşkilatının prezidenti Nabil Seyidovun sözlərinə görə, hazırda “Save the Children” təşkilatı “Ümidli gələcək” Gənclər Təşkilatı ilə birgə Azərbaycanda “Yeniyetmələr üçün Həyat Bacarıqları” proqramı adlı yeni layihə həyata keçirir. Layihənin məqsədi əlilliyi olan və internat məktəblərini tərk etməyə hazırlaşan uşaq və gənclərin peşə hazırlığını artırmaq, həmçinin onların həyat bacarıqlarını yüksəltmək və dövlət uşaq müəssisələrini tərk etdikdən sonra müstəqil yaşamaq və fəaliyyət göstərmək üçün müvafiq işlə təmin olunmalarına yardım etməkdir: “Avropa Birliyinin və “Statoil” şirkətinin dəstəyi ilə yeni başlayan bu proqram prezidentin 2006-cı ildə imzaladığı “Dövlət uşaq müəssisələrindən uşaqların ailələrə verilməsi və alternativ qayğı Dövlət Proqramının” icrasına, habelə uşaq və gənclərin peşə təhsili, peşə bacarıqlarının inkişaf etdirilməsi istiqamətində aparılan geniş fəaliyyətə dəstək olacaq”.

S.QARAYEVA

525-ci qəzet.- 2010.- 21 iyul.- S.4.