Qəhrəmanlığın daha bir ünvanı

Artıq xeyli vaxtdır ki, internetdə www.ibadhuseynov.net ünvanlı bir sayt öz yerini tutub. Saytda qəhrəman döyüşçü, Xocavənd rayonunun Muğanlı kəndində dünyaya göz açmış, Qarabağ müharibəsində kəşfiyyat bölüyünün komandiri olmuş, döyüşlərdə erməni qəsbkarlarının canına qorxu salmış “Azərbaycan Bayrağı”ordenli İbad Hüseynovun həyat və döyüş yolundan, qəhrəmanlıqlarından və insani keyfiyyətlərindən bəhs olunur. İ. Hüseynovla çiyin-çiyinə vuruşan cəbhə yoldaşları saytda onunla bağlı xatirələrini və birgə keçirdikləri döyüş əməliyyatlarına aid təəssüratlarını qələmə alıblar. Məşhur ASALA terror təşkilatının qurucularından olan, bir çox partlayış və qətillər həyata keçirmiş, Avo ləqəbi ilə tanınan terrorçubaşı Monte Melkonyanın İbad Hüseynov tərəfindən layiqli cəzasına çatdırılması ilə bağlı yazılar xüsusi maraq doğurur. Elektron səhifədə ASALA təşkilatının əsas məqsədi açıqlanıb və erməni mətbuatının dünyaya “qəhrəman kimi” sırıdığı M.Melkonyanın əsl siması göstərilib. Belə ki, bu təşkilatın məqsədi 1915- ci il hadisələrinə görə Türkiyəni “terror yolu ilə etirafa məcbur etmək” olub. Onun törətdiyi cinayətlərin təkcə Qarabağ müharibəsi zamanı etdiyi vəhşiliklərdən və Xocalı hadisələrində dinc əhaliyə tutulan divandan ibarət olmadığı bildirilir. Dünya miqyaslı terrorçu Karlos Şakalın ən fəal tələbəsi olan Avonun 1982-ci ildə Livandakı vətəndaş qarşıdurmasında Beyrutun erməni məhəllələrinin müdafiəsində iştirak etdiyi, eyni ildə Parisin Orli aeroportunda 8 nəfər insanın ölümünə səbəb olan partlayış törətdiyi və PKK terror təşkilatının üzvləri ilə əlaqə yaradaraq bir çox qətllər həyata keçirdiyi kimi həqiqətlər saytda ətraflı işıqlandırılıb. M.Melkonyanın bu vəhşiliklərinə Azərbaycan ordusunun igid döyüşçüsü, kəşfiyyat-diversiya dəstəsinin 22 yaşlı komandiri İbad Hüseynov son qoyub. O, 1993- cü il iyun ayının 12- də məşhur Avonu məhv etməyə nail olub. 1992- 93-cü illərdə Martuni rayonu istiqamətində vuruşan, 1993- cü il 12 iyunda kəşfiyyat dəstəsinin Xocavənd rayonunda Muğanlı kəndində keçirilən əməliyyatda iştirak edən 14 nəfər döyüşçüdən biri Ədalət Abbasov o günləri belə xatırlayır: “Dəstənin komandiri İbad Hüseynov bizi yandırılımış evlərin birinin zirzəmisində qoyaraq, viran qoyulmuş kəndin xarabazarlıqları arasında gəzişərkən Avo ilə rastlaşdı və onu öldürdü. Sübut üçün biz onun qol saatını, cib dəftərçəsini, qələmini, 2 ədəd şəklini və kəsilmiş başını özümüzlə gətirdik”. Qarabağ müharibəsində Xocavənd rayonu ərazisində yaradılan yerli özünümüdafiə batalyonununun tərkibində könüllü vuruşan Cəsarət Sadıqov həmin əməliyyat zamanı İbad Hüseynovun keçirdiyi hisslərdən söhbət açır: “Keçirdiyimiz saysız-hesabsız əməliyyatlarda İbad həmişə soyuqqanlı olub. Biz bilmirdik o sevinir, yoxsa təlaş keçirir. İndiyədək İbad onlarla erməni öldürmüşdü. Bir erməni nə idi ki, İbad belə həvəslənmişdi? Əvvəllər də düşmən arxasında olarkən İbad bizi gizləndiyimiz yerdə saxlayıb təkbaşına kəndləri gəzirdi”. Keçmiş döyüşçü daha sonra yazır: “Biz yalnız indi başa düşürük ki, Avo ermənilər üçün kim imiş. Amma belə məlum olur ki, onun nə kimi əhəmiyyətli şəxs olduğunu o zamanlar da bilirmişlər. Biz döyüşçü olduğumuzdan bunun bir o qədər fərqinə varmamışıq. Avo ləqəbli məşhur terrorist Monte Melkonyanın məhv edilməsi bizim üçün öldürülmüş növbəti erməni döyüşçüsü idi”. Saytda bu gün fərqli dairələr tərəfindən M.Melkonyanın ölümü haqqında həqiqətə uyğun olmayan məlumatların yayıldığı, erməni tərəfinin “əfsanəvi Avo”nun 22 yaşlı azərbaycan kəşfiyyatçısı tərəfindən öldürülərək başının kəsildiyini qəbul etmək istəmədiyi bildirilir. İbad Hüseynovun Avo ləqəbli M.Melkonyanı məhv etməsi prosesindən geniş söz açan keçmiş döyüşçü Sahib Şirinov ermənilərin bu hərəkətinə belə qiymət verir: “Yəqin bu etiraf əvəzolunmaz Avo üçün “ucuz ölümdür” qənaətinə gəlmək hesab olunardı. Qoy ermənilər sevinsinlər ki, onların əfsanəvi qəhrəmanları heç də ucuz ölümə layiq olmayıb. Avonu adi Azərbaycan əsgəri öldürməyib. Avonun İbad Hüseynov tərəfindən öldürülməsi hər ikisi üçün bir məntiqi nəticədir”. Milli ordumuzun keçmiş könüllü döyüşçüləri İ.Hüseynovla bağlı xatirə-məqalələrində onun nə qədər cəsarətli və vətənpərvər bir döyüşçü olduğunu dönə-dönə vurğulayıblar. İbad Hüseynovun apardığı əməliyyatların adətən öz dəstəsindən itki vermədən nəticələnməsi isə fərəh doğuran bir faktdır. Ancaq avtomat və pulemyotlarla silahlanmış, xüsusi təlim görməmiş kiçik bir dəstə üçün bu itkisiz əməliyyatlar, sözsüz ki, əsl qəhrəmanlıq hesab edilməlidir. Keçmiş könüllü döyüşçü Vüqar Manafov öz məqaləsində, başda İbad Hüseynov olmaqla, 8 nəfər kəşfiyyatçımızın qorxmadan erməni postuna daxil olaraq qısa zamanda 10 nəfər ermənini məhv edib, 5 ədəd avtomat, 1 pulemyot və 1 qumbaratanı ələ keçirdiyini, itki vermədən hərbi hissəyə dönmələrindən qürurla yazır. Ümumiyyətlə, haqqında söz açdığımız sayt bugünkü və gələcək nəslə mənsub gənclər üçün yüksək vətənpərvərlik, cəsarət, qəhrəmanlıq hissləri aşılayan, əhəmiyyətli bir mənbə xarakteri daşıyır. Veb-səhifədə qəhrəmanın həyat və döyüş yolunu, onunla bağlı təəssüratları əks etdirən videoçarxlar, mətbuatda igid döyüşçüyə həsr edilmiş məqalələr, İbad Hüseynova həsr olunmuş kitablar, savaş illərinə və sonrakı dövrə aid maraqlı fotolar yer alıb. İ.Hüseynov haqqında çəkilən “Əsgər” filminin təqdimat mərasimindən lentə alınmış kadrlar da saytda öz əksini tapıb. Tədbirdəki kadrlarda millət vəkili Qənirə Paşayeva, Dağlıq Qarabağın Azərbaycanlı İcması İctimai Birliyinin sədri Bayram Səfərov, Xocavənd Rayon İcra Hakimiyyətinin başçısı Eyvaz Hüseynov, polkovnik Məmməd Qədirov İbad Hüseynov haqqında fikirlərini bölüşüb, onun nəsillərə nümunə göstərilməyə layiq, əsl qəhrəman olduğunu vurğulayıblar.

Günel MUSAYEVA

525-ci qəzet.- 2010.- 22 iyul.- S.4.