Tarzən Zamiq Əliyevin yubileyi Beynəlxalq Muğam Mərkəzində qeyd olunub

Beynəlxalq Muğam Mərkəzində tanınmış tarzən, xalq artisti, Zamiq Əliyevin 60 illik yubileyinə həsr olunan mərasim təşkil edilib. Yubilyarın 40 illik yaradıcılığına həsr edilmiş videomaterialın nümayişi ilə başlanan mərasimi giriş sözü ilə xalq şairi, Azərbaycan Aşıqlar Birliyinin sədri Zəlimxan Yaqub açaraq, son illər ölkədə muğamın inkişafından danışıb: “Azərbaycan muğam tarixində, Sadıqcandan üzü bəri götürsək, bir-birindən gözəl, bir-birindən nüfuzlu, şəxsiyyətli tarzənlərimiz çox olub. Onların hər biri xalqın ürəyində sevgi, məhəbbət məbədi yaratmağı bacarıb”. Z.Yaqub Z.Əliyevi müasir dövrümüzdə tanınan, sevilən, fəallığı ilə fərqlənən sənətkar, mahir bir tarzən kimi səciyyələndirib: “Zamiq Əliyev öz yorulmaz fəaliyyəti ilə keçmişdən bizə yadigar qalan milli ənənəni qorumaqla yanaşı, daim yeniliyə, müasirliyə can atan bir ifaçıdır. Bunun nəticəsidir ki, Zamiq Əliyevin ifaları həmişə sevilə-sevilə dinlənilir”. Tədbirdə akademik Vasim Məmmədəliyev, xalq artistləri Habil Əliyev, Arif Babayev və başqaları çıxış edərək Zamiq Əliyevin mənalı ömür yolundan, istedadlı tarzən kimi Azərbaycan musiqisinin, xüsusilə milli muğamlarımızın beynəlxalq aləmdə təbliği istiqamətində yorulmaz fəaliyyətindən, bir pedaqoq kimi yeni ifaçılar nəslinin yetişməsi sahəsində xidmətlərindən söhbət açıblar, onu əlamətdar yubiley münasibətilə təbrik edərək yeni yaradıcılıq uğurları arzulayıblar: “İndiyədək dünyanın 50-dən çox ölkəsində Azərbaycan musiqisini böyük həvəslə təbliğ etmiş tarzən Zamiq Əliyev bu gün də ənənəsinə sadiqdir”. Yubilyar gecənin təşkilatçılarına və iştirakçılarına minnətdarlığını bildirib, bundan sonra da milli musiqimizin inkişafı, təbliği sahəsində fəaliyyətini davam etdirəcəyini vurğulayıb: “Mənim ən yaxın sirdaşım olan tar Azərbaycan xalqı durduqca duracaq və heç zaman kökdən düşməyəcək”. Mərasim tanınmış sənətkarların ifasında geniş konsert proqramı ilə başa çatıb. Mərkəzin foyesində yubilyarın həyat və yaradıcılığına həsr edilmiş fotosərgi də nümayiş etdirilib.

SARA

525-ci qəzet.- 2010.- 2 iyun.- S.7.