Ağcabədidə III Kitab Bayramı

Ağcabədi şəhərində rayon mədəniyyət və turizm şöbəsinin təşkilatçılığı ilə III Kitab bayramı keçirilib. Tədbirdə mərkəzləşdirilmiş kitabxana sisteminin direktoru İradə Allahverdiyeva, Qarabağ Muğam Mərkəzinin direktoru Aydın Məmmədov, şair Tahirə İsaqızı və başqaları çıxış edərək kitabsevərləri əlamətdar bayram münasibətilə təbrik ediblər. Çıxışlarda son illər ölkəmizdə kitabxana sahəsinin inkişafına göstərilən dövlət qayğısından, bilik mənbəyi olan kitabın əhəmiyyətindən, onun insan şüuruna, cəmiyyətin tərəqqisinə, insanın mənəvi aləminə müsbət təsirindən söz açılıb. Tədbirdə “Sən elə bir zirvəsən”, “2010-cu il Ekologiya İlidir”, “Kitabxanamız dövri mətbuatda”, “Ağcabədi yazarları”, “Muğamın sehri”, “Yaddan çıxmaz Qarabağ”, “Nağıllar aləmində” və digər mövzularda 1000 nüsxədən çox kitab nümayiş olunub. Oxucuların və kitabxana işçilərinin əl işlərindən ibarət sərgilər təqdim edilib. Kitab bayramında məktəblilər müxtəlif mövzuda şeirlər söyləyiblər, mahnılar ifa ediblər, səhnəciklər göstəriblər. Tədbir çərçivəsində gənc şairlər Məhsəti Musa və Gündüz Sevindikin yeni çapdan çıxmış kitablarının təqdimatı da olub.

SARA

525-ci qəzet.- 2010.- 2 iyun.- S.7.