Dubay – müasir dövrün möcüzəsi

(əvvəli ötən sayımızda)

Dubaya səyahət edənlərin baş çəkdikləri ünvanlardan biri də musiqili fəvvarənin yerləşdiyi ərazidir. Bu fəvvarəyə insan nə qədər tamaşa etsə də, yorulmur. Azərbaycanlı jurnalistlərə bu mənzərəni seyr etmək imkanını “flydubai” şirkətinin baş direktoru Qeyt əl-Qeyt yaratdı. Dubaya səfərimizin 2-ci günü cənab Qeyt bizimlə görüşdü və azərbaycanlı jurnalistlərin şərəfinə şəhərin ən dəbdəbəli restoranlarından olan “Biçe Mare” də ziyafət verdi. Restoran dünyanın ən hündür tikilisi sayılan “Bürc Xəlifə”nin yaxınlığında yerləşən nəhəng və məşhur binada – “Souk Al Bahar”da yerləşir. Adıçəkilən mərkəzdə restoranlar, mağazalar, otellər, ofis və bu kimi obyektlər mövcuddur. “Bürc Xəlifə” ilə sadalanan bir çox obyekti, o cümlədən məşhur “Biçe Mare” restoranını süni olaraq yaradılan göl birləşdirir, yaxud da ayırır. Hər axşam bu göldəki möhtəşəm mənzərə gələnləri heyran qoyur. Burada quraşdırılan musiqili fəvvarə “Bürc Xəlifə”nin ərazisi və binayla üzbəüz olan mərkəzlər uzunluğunda böyük bir ərazini əhatə edir

Nahardan əvvəl azərbaycanlı jurnalistlərlə tanış olan Qeyt əl-Qeyt bizləri maraqlandıran sualları da cavablandırdı. Qeytin sözlərinə görə, iki il əvvəl, 2008-ci ildə yaradılanda “flydubai” kağız üzərində şirkət idi. İndi isə şirkətin imkanları xeyli artıb. Cənab Qeyt deyir ki, “flydubai” şirkətinin əsas məqsədi ilk növbədə insanları gözəl səyahətə cəlb etməkdən ibarətdir. Bunun üçün “flydubai”nin təyyarələri ən müasir və təhlükəsizlik baxımından ən yaxşılardandır. “Məqsədimiz Dubayı bütün dünyada tanıtmaq və bura turistlər cəlb etməkdir. Son illərin maliyyə böhranına baxmayaraq fəaliyyətimizdə müəyyən irəliləyişlər var, ötən ilə nisbətən bazardakı payımızı 15 – 20 faizədək artırmağa nail ola bilmişik”.

Qeyd edək ki, Bakıdan Dubaya uçuş və geri qayıtma 160 manatdır. Qeyt isə deyir ki, azərbaycanlılara yeni endirimlər mümkündür. Bu istiqamətdə fəaliyyət davam edir. Şirkət müştəriləri üçün yeni əyləncələr, xidmətlər təqdim etməyi də düşünür. Belə ki, bu il şirkət uçuşlarda əyləncəli sistemin qurulmasını nəzərdə tutub. “Flydubai” müştəriləri təyyarədə internetdən istifadə edib, televizora baxa biləcəkər. Qeytin sözlərinə görə, hazırda Dubayda 160 hava yolları var. Bu sahədə rəqabət var, amma uğurlar da mövcuddur. Şirkət 15 istiqamətdə birbaşa uçuşlar həyata keçirir. Amma iyul ayından ölkələrin sayı 20-yə çatdırmaq nəzərdə tutulub. Birbaşa uçuşların həyata keçirildiyi ölkələrdən biri kimi Azərbaycanın seçilməsinin səbəbinə gəlincə, cənab Qeytin cavabı belə oldu: “Azərbaycan sürətlə inkişaf edir. Mən bir neçə dəfə ölkənizdə olmuşam. İlk dəfə Azərbaycan yeni müstəqillik qazananda rəsmi şəxs kimi ölkəyə səfər etmişəm. Üçüncü səfərim isə “flydubai”in fəaliyyətə başlaması ilə bağlı olub. Hər gəlişimdə isə Azərbaycanın, paytaxt Bakının nə qədər dəyişdiyinin, inkişaf etdiyininin şahidi olmuşam. İnsanlarınız isə səmimi və qonaqpərvərdirlər”.

Onun sözlərinə görə, istər Azərbaycanda, istərsə də Dubayda sahibkarlığın inkişafı baxımından münbit şərait mövcuddur. Yeri gəlmişkən hazırda “flydubai” ən sərfəli uçuş həyata keçirən şirkət kimi tanınır. İlkin kapitalı 65 milyon dollar olan şirkətin Dubaydan Bakıya ilk reysi 2009-cu il noyabrın 22-də gerçəkləşdirilib. Həmin vaxtdan aviaşirkət gündəlik Bakı – Dubay – Bakı reysi ilə çalışır.

Yəqin gözəl mənzərəsi olan “Biçe Mare” də təqdim olunan menyu ilə də maraqlanacaqsınız. Burada əsasən Avropa yeməkləri hazırlanır. Bizə xidmət edən ofisiantlardan birinin türk olduğundan həmkarlarım ondan menyudakı yeməklər barədə ətraflı məlumat alıb, hətta hansı yeməyi sifariş etməyin daha uyğun olduğunu da öyrəndilər. İtalyansayağı hazırlanan makarondan başlamış dəniz məhsullarına – anadonta, xərçəng, balıq və digərlərinə qədər nə istəsən var...

YERDƏN 450 METR HÜNDÜRLÜKDƏ

Dubay deyəndə yəqin ki, çoxlarının gözü önündə dünyanın ən hündürmərtəbəli binası “Bürc Xəlifə” canlanır. Son illər Dubay məhz bu tikili ilə dünyaya səs salıb. Dubayda olduğumuz ilk gündən “Bürc Xəlifə”ni uzaqdan görmək imkanımız olmuşdu. Çünki bu binanı 95 kilometr aralıdan görmək mümkündür. Səfərimizin üçüncü günü təşkilatçılar bizə “Bürc Xəlifə”ni yaxından görmək, onun 124-cü mərtəbəsinə qalxmaq imkanı yaratdılar. Səhər 8-də oteldən çıxıb “Bürc Xəlifə”yə yola düşdük. Bu ilin yanvarın 4-də təmtəraqlı açılışı ilə turistlərin böyük axınına səbəb olan “Bürc Dubay”ın hündürlüyü 830 metrə yaxın, mərtəbələrinin sayı 160-dır. İnşasına 2004-cü ildə – iqtisadi artımın çiçəkləndiyi bir vaxtda başlanılıb, açılışı isə maliyyə böhranının Dubaya kəskin təsir etdiyi bir vaxtla 2010-cu ilin əvvəli ilə üst-üstə düşür. Təxminən 6 il davam edən inşaat müddətində “Bürc Dubay” olaraq tanınan, ancaq açılış günü adı Birləşmiş Ərəb Əmirliklərinin əmiri Xəlifə Min Zahid əl-Nahyanın adına uyğun olaraq “Bürc Xəlifə” olaraq dəyişdirilən binanın 124-cü mərtəbəsindəki müşahidə zonasını hər gün minlərlə insan ziyarət edir. Smeta dəyəri 4,1 milyard dollar olan binanın tikintisində 330 min kubmetr betondan, 39 min ton armaturdan istifadə olunub. Binanın ərsəyə gəlməsi üçün hər gün 12 min işçi olmaqla 22 milyon saat çalışılıb. Binanın otaqları əsasən ofislərə icarəyə verilmək üçün nəzərdə tutulub. Ancaq bununla yanaşı, binada otellər, restoranlar, tamaşa meydanları, hovuzlar da var. Binanı amerikalı arxitektor Adrian Smit layihələndirib. Onun əsas məqsədi islam ənənələri ilə müasir Qərb üslubunun birləşdirilməsi olub. Deyilənə görə, kosmosdan baxanda binanın forması 6 ləçəkli çiçəyi xatırladır ki, bu da yalnız BƏƏ-də Safari səhrasında bitən kali çiçəyinə bənzəyir. Binanı forması da məhz burdan götürülüb. Ona görə də “Bürc Xəlifə” yə gedən yolda məhz bu çiçək şüşə altına qoyularaq nümayiş etdirilir. Eyni zamanda tunellə qalxarkən divarda ərəblərin əski və indiki həyatını, “Bürc Xəlifə”nin tikintisini əks etdirən fraqmentlər nümayiş olunur. Burada yüksək təhlükəsizlik tədbirləri görülüb. İçəri daxil olan hər kəs ciddi yoxlanıldıqdan sonra binaya buraxılır. Binaya daxil olan turistlər 400 dirhəm (110 dollar) ödəməklə dünyanın ən hündür zirvəsini fəth etmiş olduqları ilə qürurlana bilərlər. “Bürc Xəlifə” dünyanın ən sürətlə tikilən binasıdır. Elə burada yerləşən lift də dünyanın ən sürətli lifti sayılır. Liftlə

1 SANİYƏYƏ 10 METR

qalxırsan. Binanın yalnız 124-cü mərtəbəsinədək qalxmağa icazə var və bunun üçün 40-42 saniyə kifayət edər. Dünyanın ən hündürə qalxan və ən sürətli işləyən liftində azca olsa səs-küy yoxdur. Sadəcə, təzyiqi qaydasında olmayanlar bunu lift yuxarı qalxdıqca qulaqbatmaları və azca təzyiq qalxması ilə hiss edə bilərlər. 124-cü mərtəbədən isə Dubayın ən hündür binalarının belə sanki ayaqlarının altında qaldığını hiss edirsən. 450 metr hündürdə yerdə hər şey çox kiçik görünür. Amma turistlər üçün nəzərdə tutulmuş monitorlu qurğu vasitəsilə ən hündür nöqtədən aşağını aydın şəkildə izləmək mümkündür. Bu mərtəbədə kiçik mağaza da var ki, orda da “Bürc Xəlifə”nin maketini əks etdirən müxtəlif suvenerlər satılır. “Bürc Xəlifə” in ən hündür mərtəbəsində məscidin yerləşdiyi də bildirilir. Amma yuxarı mərtəbələr tam hazır olmadığı üçün hələ ki, turistlərə həmin mərtəbələri görməyə icazə verilmir.

Dubaya istirahətə gedərkən “istidir”deyib, ancaq yay geyimləri götürməyin. Çünki Dubayda 4 dərəcə şaxtaya düşə bilərsiniz. Özü də bu zarafat deyil...

(davamı növbəti sayımızda)

Sultanova P.

525-ci qəzet.- 2010.- 3 iyun.- S.2.