Bakıda Kulturoloqların II Milli forumu olub

Mədəniyyət və Turizm Nazirliyinin təşkilatçılığı ilə Kulturoloqların II Milli Forumu keçirilib. Nazirliyin mətbuat xidmətindən verilən məlumata görə, “Mədəni müxtəliflik sosial-siyasi dəyər kimi” mövzusuna həsr olunmuş tədbirin məqsədi Azərbaycanda mədəniyyətin təbliğini, təşviqini, qorunmasını və bu sahədə elmi tədqiqatların inkişafını təmin etməkdir.

Mədəniyyət və turizm nazirinin müavini Sevda Məmmədəliyeva tədbirin əhəmiyyətindən, ölkəmizin həyatında mühüm hadisə olmasından danışıb: “Prezident İlham Əliyevin mədəniyyətimizə diqqət və qayğısının nəticəsi olaraq, son dövrlər respublikamızda mədəniyyət siyasətinin aktuallığı xeyli artıb”. Heydər Əliyev Fondunun prezidenti Mehriban Əliyevanın təşəbbüsü ilə bu sahədə həyata keçirilən təqdirəlayiq tədbirləri, aşıq sənətimizin və muğamlarımızın YUNESKO-nun qeyri-maddi mədəni irs siyahısına daxil edildiyini diqqətə çatdıran nazir müavini 2010-cu ildə xalça sənətimizin də həmin siyahıya daxil edilməsinin gözlənildiyini qeyd edib. Qloballaşma dövründə kulturologiya elminin əhəmiyyətinindən söz açan S.Məmmədəliyeva Azərbaycan dövləti yalnız ölkə daxilində deyil, beynəlxalq səviyyədə də mədəniyyətlərarası dialoq siyasəti apardığını vurğulayıb.

AMEA-nın Fəlsəfə, Sosiologiya və Hüquq İnstitutunun direktoru, professor İlham Məmmədzadə qloballaşma dövründə elmin səviyyəsindən, nüfuzundan, ölkəmizdə elmin inkişafına göstərilən diqqət və qayğıdan söz açıb, kulturologiyanın digər ictimai elmlərlə əlaqəsinin vacibliyini qeyd edib.

Belarus Dövlət İncəsənət və Mədəniyyət Universitetinin prorektoru Konstantin Ramişevski təmsil etdiyi ali məktəbdə kulturoloqların hazırlanması sahəsində qazanılmış təcrübədən, iki ölkə kulturoloqlarının əməkdaşlığının genişləndirilməsinin vacibliyindən bəhs edib.

“Simurq” Azərbaycan Mədəniyyət Assosiasiyasının prezidenti, professor Fuad Məmmədov ölkəmizdə kulturologiya elminin əsaslarının onun rəhbərlik etdiyi qurum tərəfindən yaradıldığını, hazırda assosiasiyanın dünyanın bir çox yerlərində tanındığını diqqətə çatdırıb.

Forumda “Qloballaşma və mədəniyyətlərarası ünsiyyət”, “Müasir Azərbaycanda millətlərarası və dinlərarası dialoq”, “Qloballaşmış mühitdə mədəni irsin qorunması”, “Milli mənəvi dəyərlərin mühafizəsinə dövlət qayğısı” və digər mövzularda məruzələr oxunub.

SARA

525-ci qəzet.- 2010.- 5 iyun.- S.15.