Dubay – müasir dövrün möcüzəsi

(əvvəli ötən sayımızda)

“Burc Xəlifə”nin yaxınlığında yerləşən “Dubai Mall” həm də dünyada ən böyük ticarət mərkəzlərindən biri sayılır. Ticarət mərkəzi deyəndə ağlınıza yalnız alış-veriş gəlməsin. Əvvəlki yazımda qeyd etmişdim, Dubaydakı ticarət mərkəzlərinin birinə daxil olmaqla insan bütün istəklərini həyata keçirə bilir. Yəni həm rahatlıqla alış-veriş edə, həm əylənə, həm də istirahət etmək olar. “Dubai Mall”ı gəzməyə bir gün yetmir. Ticarət mərkəzinin giriş-çıxışları da çoxdur. Ona görə mütləq xəritə ilə hərəkət etmək lazımdır. Ümumiyyətlə, Dubayda bütün ticarət, istirahət mərkəzlərində xəritələr təqdim olunur ki, ünvanı asan tapmaq mümkün olsun. Həmçinin elektron lövhələr də quraşdırılıb. Adətən belə gəzintilər zamanı görüş vaxtı və yeri təyin ediləndən sonra 17 nəfərlik qrupumuz kiçik qruplara ayrılırdı. Ticarət mərkəzində iri şəlalədən tutmuş, nəhəng akvariumadək hər şeyə rast gəlmək olar. Burda satılan mallar isə yüksək keyfiyyəti və markaları ilə fərqlənir. “Dubay Mall”dakı akvariumda müxtəlif növ irili-xırdalı balıqların, hətta akulaların aram-aram üzməsini seyr etmək insanın həm də yorğunluğunu çıxarır...

40 DƏRƏCƏ İSTİDƏN 4 DƏRƏCƏ ŞAXTAYA

Dubayda yay ayları tempuratur 40 dərəcəni keçir. Amma birdən-birə 4 dərəcə şaxtalı qışla da qarşılaşmaq mümkündür. Təbii ki, bu istəkdən asılıdır. İnanmıram ki, Dubayda bayırdakı dəhşətli istilərdən bezib, bir neçə saatlığa da olsa özünüzü qış fəslində hiss edib, qartopu oynamaq, xizmək sürmək ürəyinizdən keçməsin. “Mall of the Emirates”ə gəzinti səfərimizin sonuncu günündə nəzərdə tutulmuşdu. Bu iri ticarət mərkəzində öncə “SKİ Dubay”a baş çəkməli idik. Amma vaxtımızın az olduğunu bilirdik. Çünki həmin gün axşam Bakıya qayıdacaqdıq. Ona görə tələsməli idik. Dubayda insan əli ilə hər şey yaratmaq mümkün olub. Hansı ki, insanların yaratdıqları elə insanlara möcüzə kimi görünür. Bircə təbiətə qalib gəlmək, iqlimi dəyişmək mümkün olmayıb. Amma təbii iqlim şəraiti imkan verməsə belə, Dubay şəhərə üz tutanlara bütün fəsillərin gözəlliklərini duymağa nail olunub. Beləliklə isti yayda qışın ləzzətini yaşamaq fürsətini əldən vermədən bizə təqdim olunan isti corab, xüsusi paltar və çəkmələri geyib buz meydançasına daxil olduq. Bu geyimdə o qədər də soyuq hiss etmirsən, amma hər ehtimala qarşı Dubaya gedərkən buz meydançasında olmağı planlaşdırsanız, onda nisbətən isti paltar götürməyi unutmayın. Çünki əvvəl hiss etməsəniz də sonra üşüməyə başlayırsan. Necə ki, geyinərkən şüşənin arxasından meydançaya tamaşa edib bizi qarlı şaxtalı qış gözlədiyini bilsək də, əlcək, papaq götürməkdən imtina etdik. Hələ də inanmaq olmurdu ki, doğurdan da şüşənin bir üzündə isti yay, digər üzündə isə qarlı qış hakim kəsilib. Xizək meydaçasına daxil olan da daha da təəccübləndik. Burada əsl qış hökm sürürdü. Qartopu oynayanda isə əlcək götürməməyimizə peşiman olduq. Bununla belə həmkarlarım bir-birlərinə qar yedirtməyi də unutmadılar. Hər tərəfi şüşə ilə örtülü böyük bir ərazini əhatə edən “SKY Dubay”da xüsusi aparatlar vasitəsilə qar düzəldilir. Qışa, qara aid olan bir çox atributu burada görmək olar – qar adamı, pinqvin, şam ağacları, buzdan düzəldilmiş kiçik domiklər, mağaralar... və təəccüblü də olsa qızmar Dubayda 4 dərəcə şaxta. Xizək meydanının uzunluğu 400 metrdən çoxdur. Tikintisinə milyardlarla dollar xərclənən bu xizək meydançasında istirahət isə elə də baha deyil. Qiymət orada keçirilən vaxta görə dəyişir. Buradakı buz əjdaha, ev və digər əşyalar buz şəhərciyini xatırladır. Mərkəzlə yerləşdiyi ərazini şəffaf şüşə örtük ayırdığından bayırdakı insanların nazik yay geyimində, içəridə isə insanların şaxtalı havada xizək sürməsi kimi ideya insanı həqiqətən heyrətləndirməyə bilmir. “Yarım saata çıxarıq”dediyimiz meydançadan isə iki saata elə ki, ayrıldıq. Xizək meydançasında keçirdiyimiz vaxt səfər müddətinin ən yadda qalan əyləncələrindən biri oldu.

“Mall of the Emirates”də gəzinti isə çox çəkmədi. Düzdür, bura alış-veriş üçün çox sərfəlidir. Qiymətlər digər mərkəzlərə nisbətən bir qədər ucuzdur. Amma vaxtımız çox az idi. Ümumiyyətlə, Dubayda ticarət mərkəzlərində bütün dünyada tanınan markaların məhsullarına daha çox rast gəlmək olur. Bu da təbiidir. Çünki Dubayda istirahətə gələn əcnəbilər sözsüz ki, varlı təbəqəyə məxsusdurlar. Amma Dubayda satılan malların bir üstünlüyü də keyfiyyətlə bağlıdır. Azərbaycanda satılan eyni firmaya məxsus mala Dubayda satılanlar arasında keyfiyyət baxımından yerlə göy qədər fərq var. Qiymətlərə gəlincə, Dubayda bir qədər ucuzdur. Burada elektronika məhsulları həm keyfiyyətli, həm də Bakıdan 20-30 faiz ucuzdur...

“Mall of the Emirates”də nahar edib yığışmaq üçün tələsik otelə gəlirik. Bunun üçünsə beş dəqiqəmiz var. Əks halda təyyarəyə gecikə bilərdik. Amma bu dəfə həmkarlarım alman dəqiqliyi nümayiş etdirib deyilən vaxtda artıq otelin foyesində idilər.

Beləcə, Dubayla vidalaşırıq. Həmkarlarımdan biri “görəsən Dubaya bir də nə vaxt gələcəyik?”deyir. Səfərimizin təşkilatçılarından olan Tariyel Cəlallı isə zarafatla “öz hesabınıza nə vaxt istəsəniz”dedi. Çətin ki, azərbaycanlı jurnalistlər öz hesablarına nəinki Dubayda, Azərbaycanın rayonlarından birində belə istirahət etsinlər.

İstirahət imkanı olanlara isə Dubayı görmək fürsətini qaçırmamaq məsləhətdir. Çünki Dubayda sizi həqiqətən möcüzələr gözləyir...

P.SULTANOVA

525-ci qəzet.- 2010.- 4 iyun.- S.2.