Kitab Klubunda “Saturnun tövbəsi” təqdim olunub

Kitab Klubunun sərgi salonunda xalq yazıçısı Çingiz Abdullayevin “Saturnun tövbəsi” kitabının təqdimat mərasimi olub. Tədbiri giriş sözü ilə açan tərcüməçi Təbəssüm Muxtarova əsərin süjet xəttindən bəhs edib: “Kitabdakı hadisələr qədim Roma mifologiyasından qaynaqlanır. Saturn anasının təhriki ilə övladlarına nifrət edən atası Urana əl qaldırır və hakimiyyəti ələ alaraq onun yerinə keçir. Valideynlərinə qarşı göstərdiyi münasibətdən xoflanan Saturn öz övladlarını diri-diri yeyərək udur. Əsərin qəhrəmanı Solaxay ləqəbli killerin həyat yoldaşının qeyri-insani hərəkətləri və bir sıra digər amillər sonda həyat faciəsinə – sevən atanın Saturna qarşı düşmənə çevrilməsinə gətirib çıxarır”. T.Muxtarova kitabın tərcümə prosesi barədə də məlumat verib. Əsərlərini rus dilində yazan Ç.Abdullayev “Saturnun tövbəsi”ni Azərbaycan oxucularına çatdırdıqları üçün kitabın redaktoru Munisə Dadaşqızına, tərcüməçisi Təbəssüm Muxtarovaya, tədbirin təşkilatçılarına və iştirakçılarına minnətdarlıq edib.

525-ci qəzet.- 2010.- 10 iyun.- S.7.