Rəsul Rzanın 100 illiyi Moskvada qeyd olundu

İyun ayının 12 – də Moskvanın Mərkəzi Yazıçılar Evinin böyük zalında Azərbaycan Yazıçılar Birliyinin Moskva bölməsinin, “Ocaq” Moskva Azərbaycan mədəniyyəti cəmiyyətinin,Moskva Mərkəzi Yazıçılar evinini birgə təşkil etdiyi və Azərbaycanın Rusiyadakı səfirliyinin dəstəyi ilə xalq şairi Rəsul Rzanın 100-illiyinə həsr edilmiş yubiley gecəsi keçirildi.

Tədbiri giriş sözüylə tanınmış türkoloq-alim, filologiya elmləri doktoru, Moskva Dövlət Linqvistika Universitetinin professoru, Azərbaycan Yazıçılar Birliyinin Moskva bölməsinin sədri Tofiq Məlikli açdı. O, şairin həyat və yaradıcılığı haqda məlumat verdi: “Rəsul Rzanın XX əsr Azərbaycan ədəbiyyatında, Azərbaycan şeirində bir dönüş yaradan, yeni poeziya məktəbinin bünövrəsini qoyan, novator şair olduğu hamıya məlumdur. Şəxsən mən və bizim nəslin bir çox nümayəndəsi məhz Rəsul Rza məktəbindən bəhrələnib. Rəsul Rza Allahın ona bəxş etdiyi ömrü mübarizələrdə keçirdi. Dünyanın ən ədalətli hakimi tarixdir. Zaman hər şeyi öz süzgəcindən keçirir, gec-tez haqq-ədalət öz yerini tutur. Tarixin, zamanın çətin sınaqlarından üzüağ çıxan şairin yaratdığı ölməz əsərlər, onun keçdiyi həyat yolu bu gün sübut edir ki, şairin yoxluğundan otuz ildən çox vaxt keçsə də Rəsul Rza poeziyası yaşayır və yaşayacaq”.

Tədbirdə Azərbaycandan gəlmiş nümayəndələr – şairin oğlu, Azərbaycan Yazıçılar Birliyinin sədri, xalq yazıçısı Anar, şairin nəvəsi Günel Anarqızı, xalq yazıçısı Çingiz Abdullayev, şair Çingiz Əlioğlu, yazıçı Natiq Rəsulzadə, Ədəbiyyat fondunun sədri Nazim İbrahimov,- yazıçılar, şairlər, ictimai xadimlər iştirak ediblər.Tədbirdə xalq yazıçısı Rüstəm İbrahimbəyov, Moskva Yazıçılar İttifaqının sədri Yevqeni Sidorov, “Drujba narodov” jurnalının baş redaktoru Aleksandr Ebonoidze, tənqidçi Lyudmila Lavrova, şairin şeirlərinin tərcüməçisi Mixal Sinelnikov, xalq yazıçısı Çingiz Abdullayev və başqaları çıxış etdilər, şairin yaradıcılığından, xatirələrindən söz açdılar. Sonra bədii hissə oldu. Azərbaycandan gəlmiş opera müğənnisi Azər Zeynalov şairin şeirlərinə bəstələnmiş mahnıları ifa etdi. Aktyorlar Fəxrəddin Manafov və Mehriban Zəkinin yaratdıqları Rəsul və Nigar obrazları tamaşaçılar tərəfindən dəfələrlə alqışlandı. Xalq şairi Fikrət Qoca Rəsul Rza adına Beynəlxalq mukafatları Azərbaycanın Rusiyadakı səfiri Polad Bülbüloğluna, şairə tərcüməçi Alla Axundovaya və Tofiq Məlikliyə təqdim etdi. Tədbir zamanı Moskvada fəaliyyət göstərən “Simurq quşu” teatrının aktyorlarının, Moskvadakı Azərbaycan təmayüllü 157 saylı məktəbin şagirdlərinin Rəsul Rzanın əsərləri əsasında hazırladıqları tamaşalar maraqla qarşılandı.

Nəbi VERDİYEV

525-ci qəzet.- 2010.- 18 iyun.- S.7.