“Ziyalı ünsiyyəti”ndə musiqinin rolu

“Aydınlığa doğru” Milli-Mənəvi Dəyərlərin Qorunması İctimai Birliyi aylıq “Ziyalı ünsiyyəti” çərçivəsində GRBS Beynəlxalq Tədris Mərkəzi növbəti görüşü təşkil edib. Bu dəfəki görüşün mövzusu “İnsan həyatında musiqinin yeri”- may toplantısının davamı olaraq “Musiqi əyləncədir, yoxsa təfəkkür tərzi” adlanıb. Budəfəki tədbirdə qonaq qismində görkəmli xanəndə, xalq artisti Alim Qasımov onun qızı Fərqanə Qasımova, sənətşünaslıq elmləri doktoru, professor Sevil Fərhadova iştirak edib.

Professor Zümrüd Dadaşzadə, əməkdar artist Azərin, əməkdar memar Sabir Orucov, professor Rəfiqə Əzimova, filologiya elmləri namizədi Mömünat Ömərova, fəlsəfə elmləri doktoru Əhməd Qəşəmoğlu, yazıçı-sənətşünas Sara Oğuz, rəssam Elçin Hami Axundov, kinorejissor Elçin Musaoğlu, psixoloq Elmir Əkbərin qatıldığı mərasimə birliyin sədri, tanınmış telejurnalist Solmaz Əmirli aparıcılıq edib. S. Əmirli görüşün məram və məqsədindən danışaraq əvəzsiz nemət olan musiqinin, xüsusilə də muğamın sadəcə bir əyləncə üsulu deyil, dərin məna kəsb edən nemət, yüksək mənəvi dəyər və özünəməxsus bir təfəkkür vasitəsi olduğunu qeyd edib.

Tədbirdə çıxış edən GRBS Beynəlxalq Tədris Mərkəzinin nümayəndəsi Bəhram Qurbanov açaraq gənclərin maariflənməsi yönündə müxtəlif layihələr həyata keçirən təlim mərkəzinin ziyalı görüşlərinə bundan sonra da həvəslə ev sahibliyi edəcəyini söyləyib.

S. Fərhadova çıxışında muğamın fəlsəfəsi haqqında ətraflı söz açıb.

Azərbaycan muğamını dünya miqyasında təbliğ edən və sevdirən A.Qasımov məhz öz həyatında musiqinin yerindən, muğamın insan düşüncəsinə təsirindən danışıb.

Z. Dadaşzadə çıxışında ünsiyyətdə olduğu məşhur dünya musiqiçilərinin Alim Qasımov və Azərbaycan muğamı haqqında söylədiklərini qonaqların diqqətinə çatdırıb.

Görüşdə “Ziyalı ünsiyyəti” klubunun üzvləri və digər qonaqlar Alim və Fərqanə Qasımovlara Azərbaycan muğamının dünya miqyasında təbliğində onlara daha böyük uğurlar arzulayıblar.

Sonda S.Əmirli görüş iştirakçılarına ənənə üzrə Birliyin diplomlarını və xatirə hədiyyələri təqdim edib.

S. MÜRVƏTQIZI

525-ci qəzet.- 2010.- 17 iyun.- S.7.