Mahnı Teatrında Musa Ələkbərlinin yubileyi qeyd olunub

Mədəniyyət və Turizm Nazirliyi və Azərbaycan Yazıçılar Birliyinin birgə təşkilatçılığı ilə R. Behbudov adına Dövlət Mahnı Teatrında şair Musa Ələkbərlinin anadan olmasının 60 illiyinə həsr olunmuş yubiley gecəsi keçirilib.

Gecədə baş nazirin müavini Elçin Əfəndiyevin təbrik məktubu oxunub.

Tədbirdə Mədəniyyət və Turizm Nazirliyinin nümayəndəsi Elbəy Əli, xalq şairi Nəriman Həsənzadə, millət vəkilləri Nizami Cəfərov, Tahir Rzayev, Nazim Məmmədov, filologiya elmləri doktoru, professor Qəzənfər Paşayev, tənqidçi Vaqif Yusifli, şairlər İlyas Tapdıq, Oqtay Rza, Ədalət Təbrizli, yazıçı-dramaturq Elçin Hüseynbəyli və digərləri Musa Ələkbərlinin həyat və yaradıcılığından söhbət açıblar:

Musa Ələkbərli 1950-ci ildə Gədəbəydə dünyaya gəlib. 1974 – cü ildə Azərbaycan Dövlət Universitetinin filologiya fakültəsini bitirib. Elə həmin ildən də “Gənclik” nəşriyyatında redaktor kimi əmək fəaliyyətinə başlayıb. Müxtəlif illər ərzində əvvəlcə redaktor, sonra böyük redaktor kimi həmin nəşriyyatda naşirlik işini davam etdirib. Şeirləri bir çox dillərə tərcümə olunan şair “Məndən şeir istə”, “Ürəyimin işığında”, “Bəlkə bir də görüşdük”, “Gözlərim yol çəkir, “Aydanım ay işığı”, “Sevgi bulağı”, “Gözümdə ağlayan bulud”, “Dünya sevgidən doğulub”, “Tanrı mənə söyləməsə, yazmaram” kitablarının müəllifidir.

Musa Ələkbərli 2001- ci ildə “Azərbaycan” jurnalında çap olunan silsilə şeirlərinə görə Yazıçılar Birliyinin İsa İsmayılzadə adına poeziya mükafatına layiq görülüb”. Tədbirdə çıxış edənlər yubilyarın xalq ruhuna bağlı, milli ənənələrə dərindən bələd şair olduğunu, şeirləri ilə könülləri oxşadığını bildiriblər. Tədbirdə bədii qiraət ustaları şairin yaradıcılığından nümunələr səsləndirib, tanınmış müğənnilər, Gədəbəy və Təbriz aşıqları şeirlərini saz havaları üstündə ifa ediblər.

Sonda şair çıxış edərək yaradıcılığına göstərilən dərin ehtirama görə tədbirin təşkilatçılarına və iştirakçılarına minnətdarlığını bildirib, yeni şeirlərini oxuyub.

SARA

525-ci qəzet.- 2010.- 22 iyun.- S.7.