Yazıçılar Birliyində Yusif Kərimovun yubileyi qeyd olunub

Yazıçılar Birliyində (AYB) tanınmış yazıçı-publisist, dramaturq Yusif Kərimovun 70 illik yubileyinə həsr olunan yaradıcılıq gecəsi keçirilib. Bu barədə AYB-nin mətbuat xidmətindən məlumat verilib. Tədbirdə çıxış edən AYB-nin katibi, xalq şairi Fikrət Qoca Yusif Kərimovu Azərbaycan ədəbi mühitində öz yeri, öz dəsti-xətti ilə fərqlənən yaradıcı ziyalılarımızdan biri kimi səciyyələndirib. Xalq şairi Nəriman Həsənzadə yubilyarın həyat və yaradıcılıq yoluna nəzər salıb: “Yusif Kərimov 1940-cı ildə Bərdədə dünyaya gəlib. Azərbaycan Dövlət Universitetinin jurnalistika fakültəsini bitirib. “Bakı” qəzetində şöbə müdiri, “Azərbaycan Dövlət Televiziya və Radio Verilişləri” Qapalı Səhmdar Cəmiyyətində, “Azərbaycan gəncləri” qəzetində baş redaktor və digər vəzifələrdə peşəkar jurnalist kimi özünü təsdiq edib. Yusif Kərimov 16 kitabın müəllifidir”. Şairlər İlyas Tapdıq, Yusif Həsənbəy və digərləri yubilyarın səmimiyyətindən, söz dünyasının əlvanlığından söz açıblar. Tədbir çərçivəsində yazıçının ulu öndər Heydər Əliyevin unudulmaz xatirəsinə həsr etdiyi “Əbədiyyət yolu” adlı esselər toplusunun təqdimatı da keçirilib. Kitabın redaktoru və ön sözün müəllifi filologiya elmləri namizədi Yalçın Əlizadədir. Sonda Y. Kərimov yaradıcılığına göstərilən ehtirama görə tədbirin təşkilatçılarına və iştirakçılarına minnətdarlığını bildirib.

SARA

525-ci qəzet.- 2010.- 24 iyun.- S.7.