Gəncə Dram Teatrı mövsümü Mir Cəlalın “Ərik ağacı” ilə yekunlaşdıracaq

Gəncə Dövlət Dram Teatrı 115-ci mövsümünə Mir Cəlal Paşayevin “Ərik ağacı” əsəri əsasında səhnələşdirdiyi eyniadlı tamaşa ilə yekun vuracaq. Teatrın direktoru Əli Qasımovun bildirdiyinə görə, başa çatan teatr mövsümü kollektiv üçün uğurlu olub: “Yaradıcı kollektivimiz Gəncə teatrsevərlərinə bu mövsüm ərzində bir neçə yeni əsər təqdim edib. Şair-dramaturq Xəzangülün “Məhəbbətin qənimi”, Əli Əmirlinin “Varlı qadın “, Elçinin “Ölüm hökmü” və görkəmli yazıçı Mir Cəlal Paşayevin “Ərik ağacı” əsərləri əsasında hazırlanmış tamaşalar Gəncə tamaşaçıları tərəfindən alqışlarla qarşılanıb. Bu uğuru təhlil edərək kollektiv olaraq belə qərara gəlmişik ki, teatr mövsümünü elə Mir Cəlal Paşayevin “Ərik ağacı” əsəri əsasında səhnələşdirdiyi tamaşa ilə başa vuraq. Yaxın günlərdə yaradıcı heyət həmin tamaşanı təqdim edəcək və sentyabr ayının 15-dək Gəncə teatrsevərlərindən ayrılacaq”.

SARA

525-ci qəzet.- 2010.- 25 iyun.- S.4.