Beynəlxalq film festivalında ölkəmizi “Kuklalar” təmsil edəcək

İyulun 2-də Çexiyanın Karlovı Varı şəhərində beynəlxalq film festivalı keçiriləcək. Festivalda ölkəmizi Çingiz Rəsulzadənin rejissoru olduğu “Kuklalar” filmi təmsil edəcək. Ç.Rəsulzadənin sözlərinə görə, “Kuklalar” filmi iyulun 7-də nümayiş olunacaq: “Bu festival Kann, Venesiya və Berlin kino festivallarından sonra dördüncü ən yaxşı festivaldır. A kateqoriyalı festivalda filmimiz də iştirak edəcək. Ümidvarıq ki, festivaldan uğurla qayıdacağıq”. Ç.Rəsulzadə bildirib ki, festivalda dünyanın bir çox ölkələrinin, o cümlədən Rusiya, Ermənistan, Estoniya istehsalı olan filmlər göstəriləcək və müsabiqədə iştirak edəcək. Festivalda “Kuklalar” filminin nümayişində iştirak etmək üçün Ç.Rəsulzadə Çexiyaya səfər edəcək. Qeyd edək ki, “Kuklalar” filmi nin ssenari müəllifləri Ramiz Fətəliyev, Çingiz Rəsulzadə, rejissoru Çingiz Rəsulzadə, operatoru Yuri Varnovski, rəssamı Rövşən Mehdiyevdir. Filmdə Mehriban Xanlarova, Abbas Qəhrəmanov, Nübar Novruzova, Xalidə Quliyeva, Cavid Quliyev və başqaları çəkilib. Festival iyulun 10-a kimi davam edəcək.

SARA

525-ci qəzet.- 2010.- 25 iyun.- S.4.