Şəmkirdə qiymətli arxeoloji materiallar aşkarlanıb

Bugünlərdə Azərbaycan Milli Elmlər Akademiyasından (AMEA) Şəmkirdə aparılan arxeoloji tədqiqatlarla bağlı məlumat verilib. Artıq üç ildir aparılan işlər zamanı orta əsrlərə aid edilən Şəmkir qalası yerinin sahəsi son tədqiqatlar zamanı 28 hektar olduğu müəyyənləşdirilib. Tikildiyi IX əsrə aid edilən qala divarlarının eni 3-3.5 metrdir. Mədəniyyət və Turizm Nazirliyinin və Regionların İnkişafı İctimai Birliyinin təşəbbüsü ilə AMEA-nın Arxeologiya və Etnoqrafiya İnstitutun ekspedisiyası Orta Əsr Şəmkir şəhərinin Narın-qalasında 400 kvadratmetr sahədə arxeoloji qazıntı aparıb. Tarix elmləri doktoru Tarix Dostiyevin rəhbərliyi ilə aparılan arxeoloji qazıntı zamanı müəyyən olunub ki, şəhəristandan şərqə doğru şəhərin sənətkarlıq məhəllələri şimal, cənub və qərb tərəfə genişlənib. Qalanın şərq divarı 80 metr uzunluğunda torpaq qalıqlarından təmizlənərək tədqiq olunub və divarın konstruktiv xüsusiyyətləri dəqiqləşdirilib. IX-XIX əsrə qədər yaşayış mərhələləri öyrənilib. Arxeoloji qazıntılar zamanı olduqca zəngin və müxtəlif dövrü əhatə edən əşyalar aşkar edilib. Bura mis sikkələr, dəmir alətlər, dəmirdən müxtəlif silah nümunələri, dəmir ox ucluqları, inşaat materialları, çox sayda şirəli və şirəsiz saxsı qab nümunələri, fayans qablar narın qalanın tarixi barədə maraqlı elmi məlumatlar aşkarlanıb.

SARA

525-ci qəzet.- 2010.- 26 iyun.- S.18.