Muzey Mərkəzində görkəmli aktyor İsmayıl Əfəndiyevin 100 illiyi qeyd olunub

Muzey Mərkəzində əməkdar artist, aktyor və rejissor İsmayıl Əfəndiyevin 100 illik yubileyi münasibətilə mərasim keçirilib. Dövlət Film Fondunun təşkilatçılığı ilə reallaşan tədbirdə Fondun direktoru, əməkdar incəsənət xadimi Cəmil Quliyev çıxış edərək İ. Əfəndiyevin həyat və fəaliyyətindən söz açıb: “ İsmayıl Əfəndiyev 1910-cu ildə Şamaxı şəhərində dünyaya gəlib. Bakı Pedaqoji Texnikumunu bitirdikdən sonra Gənc İşçi Teatrında çalışıb. İsmayıl Əfəndiyev çəkildiyi “Arşın mal alan”, “O olmasın, bu olsun”, “Fətəli xan”, “Koroğlu”, “Qızmar günəş altında”, “Kölgələr sürünür”, “İnsan məskən salır” kimi filmlərdə yaddaqalan obrazlar yaradıb, 200-dək xarici filmin Azərbaycan dilinə dublyajında iştirak edib”. Tədbirdə Yazıçılar Birliyinin sədri, xalq yazıçısı Anar, kinoşünas Aydın Kazımzadə və digərləri yubilyar haqqında danışıblar. Mərasimdə aktyorun çəkildiyi filmlərdən hissələr və fotosərgi nümayiş etdirilib. Sonda İ.Əfəndiyevin ailə üzvləri adından kürəkəni Nüstər Hüseynov çıxış edib, tədbirin təşkilatçılarına və iştirakçılarına minnətdarlığını bildirib.

SARA

525-ci qəzet.- 2010.- 30 iyun.- S.4.