“Qatil” bu dəfə İrəvan Dövlət Dram Teatrının təqdimatında

Cəfər Cabbarlı adına İrəvan Dövlət Azərbaycan Teatrı xalq yazıçısı Elçinin “Qatil” tamaşasının premyerasını təqdim etdi. Premyera Səməd Vurğun adına Dövlət Rus Dram Teatrının səhnəsində olub. Quruluşu və səhnə tərtibatı Nazir Rüstəmova məxsus tamaşanın rejissor assistenti Elnarə Heydərova, musiqi tərtibatçısı Sevda Ələkbərzadədir. Tamaşada rolları əməkdar artistlər Esmiralda Şahbazova (kimya müəlliməsi), Vaqif Kərimov (qonşu kişi), aktyorlar Nurbəniz Niftəliyeva (qonşu qadın), Niyaməddin Səfərəliyev oynayırlar.

Bayırda ildırım çaxır, şiddətli yağış yağır. Müəllimə evdə dərs dediyi şagirdlərin dəftərlərini onlarla “danışa-danışa” yoxlayır: “Həsənzadə bu nədi belə yazmısan? Sənə iki verirəm. Əhmədov sən gələcəkdə kimyaçı olacaqsan”... Qapının açıq olduğunu görən qonşu qadın içəri daxil olur. Arxasınca da həyat yoldaşı. O, polis işçisidir, artıq neçə ildir, bu sahədə çalışmasına baxmayaraq, indiyəcən elə də önəmli bir cinayətin üstünü aça, cinayətkar yaxalaya bilməyib, ona görə də gileylənir. Evə gələn digər “çağrılmamış qonaq” müəllimənin 18 il öncə dərs dediyi, çox kitab oxuduğundan “Kitab” ləqəbi almış gənc kişidir. O ağlayaraq, müəlliməyə öz eşqini etiraf edir və başına gələn bütün əhvalatları aşiq olduğu müəlliməsinə danışır: “Universitetdə oxuyarkən bir qız üstündə ordan xaric olundum və məni həbsə atdılar. Anam mən həbsdə olarkən vəfat edib. Sonra hərbi qulluğa göndərildim, yaralanaraq geri qayıtdım”. Artıq 41 yaşı olan müəllimənin gözlədiyi, deyəsən, elə budur. Mərhum Rafiq Babayevin ifasında məşhurlaşan “Əlvida” mahnısı Sevda Ələkbərzadənin təqdimatında bu səhnənin daha uğurlu alınmasına şərait yaradır. Bir müddət gənc kişi müəllimənin evində qalır və qonşular bu haqda şaiyələr yayırlar. Müəllimə kişi haqqında bütün doğru məlumatları əldə edir. Əslində, “Kitab” ləqəbli gənc kişi universitetdən qıza görə yox, paltar oğurladığından qovulub və tutulub. Onun anası sağdı və müəllimənin qızıl üzüyünü sataraq, pulunu anasına verib. Qadın hər şeyi öyrənəndən sonra kişinin evdən getməsini tələb edir, kişi isə qadına “gəl məni oğulluğa götür” deyir. Hətta qadını təhdid edir ki, əgər məni oğulluğa götürməsən, səndən şikayət edəcəyəm. Daxili iztirabları və kişiyə duyduğu nifrəti müəlliməni məcbur edir ki, onun içkisinə zəhər töksün. Belə də edir və səsə gələn qonşu polisə “Təbrik edirəm, siz qatil tutdunuz” – deyir.

Müəllif mətni, rejissor işi, aktyor oyunu, musiqi və səhnə tərtibatını bəyənən tamaşaçılar bunu “Qatil”in nümayişindən sonra səslənən gur alqışlarla ifadə etdilər.

Hüsniyyə İSMƏTQIZI

525-ci qəzet.- 2010.- 2 mart.- S.7.