Laura Cəbrayıllı “Yeddinci qat”a imza atdı

“BU KİTABDAKI PUBLİSİSTİK YAZILAR MÜXTƏLİF MÖVZULARLA, GÖRKƏMLİ ŞƏXSİYYƏTLƏRLƏ BAĞLI QƏLƏMƏ ALINMIŞ DƏYƏRLİ ƏDƏBİYYAT NÜMUNƏLƏRİDİR”

R.Məcid L.Cəbrayıllının ötən əsrin 90-cı illərindən dövri mətbuatda dərc olunan ədəbi-publisistik yazılarının oxucular tərəfindən böyük maraq və rəğbətlə qarşılandığını bildirib: “Laura Cəbrayıllının kitabında yer alan publisistik yazılar müxtəlif mövzularla, görkəmli şəxsiyyətlərlə bağlı qələmə alınmış dəyərli ədəbiyyat nümunələridir. Məncə, kitabın əsas özəlliyi ondadır ki, buraya unudulmuş ədəbiyyat cəfakeşləri – Aydın Məmmədov, Vidadi Məmmədov kimi şəxsiyyətlər haqqında yazılar da daxil edilib”. L.Cəbrayıllını “sözə həssaslıqla yanaşan qələm adamı” adlandıran R.Məcid təqdim olunan kitabı, az sözlə böyük mənalar ifadə etməsi baxımından, yüksək qiymətləndirib.

Professor Rafiq Əliyev L.Cəbrayıllını ictimai nüfuza, geniş intellektual imkanlara, insanlarla ünsiyyət qurmaq bacarığına malik publisist kimi səciyyələndirib.

Şair Tofiq Abdin bədii ədəbiyyatla publisistika arasındakı sərhədin əslində şərti olduğunu vurğulayaraq, L.Cəbrayıllının yaradıcılığını da bu aspektdən dəyərləndirib: “Dünyanın böyük yazıçılarının əksəriyyəti – Markes, Folkner və başqaları ədəbiyyata publisistikadan gəliblər. Laura Cəbrayıllının yaradıcılığına diqqətlə yanaşdıqda burada ədəbiyyatla publisistikanın sərhədinin əridiyini görmək mümkündür. Onun publisistikası detallı publisistikadır. Laura xanımın yazılarında onun özünü tapmaq mümkündür. Konkret olaraq, onun xalq yazıçısı Sabir Əhmədov haqqında qələmə aldığı yazıya nəzər yetirsək, görərik ki, bunun strukturunda bir ağrı var. Laura Cəbrayıllının bir publisist kimi ən önəmli cəhəti budur ki, başqaları haqqında yazdığı yazılarda da onun özü var”.

Həmid Cəfərov L.Cəbrayıllının Azərbaycanın tanınmış şəxsiyyətləri haqqında ədəbi portretlərini yüksək qiymətləndirərək, Hüseyn Cavidlə bağlı araşdırmasını xüsusi qeyd edib: “Laura Cəbrayıllı Hüseyn Cavid mövzusuna çox həssaslıqla yanaşıb və araşdırmasında bu mövzunu ustalıqla qələmə alıb. Müəllif böyük mütəfəkkir Cavidin başına gələnləri publisist qələmilə, eyni zamanda böyük ürəkağrısı ilə yazıb”.

Kitabın ön söz müəllifi şair Vaqif Bayatlı Odər L.Cəbrayıllının yazılarında türk qızının gücünü, ruhunu və deyim tərzini hiss etdiyini önə çəkib: “Laura Cəbrayıllının kitabında mən əsl türk qadınının simasını görürəm. Bizim qadınlarımızı bir sözlə ifadə edərdim: Fədakar. Onlar ruhi, cismani basqılara baxmayaraq, milli ruhu qoruyub saxlamağı bacarırlar. Laura da belələrindəndir”. Şair müəllifin kitabına məmnuniyyətlə ön söz yazdığını bildirərək L.Cəbrayıllının Xudu Məmmədov, Rəmiş, Mehdi Bəyazid, Vidadi Məmmədov və başqaları haqqında qələmə aldığı yazılarında çox diqqətli, güclü müşahidə qabiliyyətinə malik bir publisist kimi çıxış etdiyini deyib.

Kitabın redaktoru və naşiri Umud Rəhimoğlu L.Cəbrayıllının həm qələm adamı, həm də insan kimi yüksək mənəvi keyfiyyətlərindən söz açıb. Naşir “Yeddinci qat”ı “gözəl publisistika nümunəsi olmaqla yanaşı, zəngin təəssüratlara söykənən faktlar toplusu” adlandırıb.

Xanəndə Sabir Abdullayev L.Cəbrayıllını sənət adamları ilə apardığı müsahibələrində çox maraqlı məqamları işıqlandırmağa qabil jurnalist kimi gördüyünü dilə gətirib.

Şair Qulu Ağsəs “Yeddinci qat”da hörmət bəslədiyi insanlar haqqında yazıların yer alması səbəbindən kitabın onun üçün xüsusi dəyər kəsb etdiyini vurğulayıb.

Tanınmış aktyor Şamil Süleymanov çıxışını yumoristik notlar üzərində qurub: “Bir dəfə Laura xanım məndən müsahibə götürmüşdü. Onda söhbətimizdən mənim üçün çox aktual olan mövzunu da başlığa çıxarmışdı: “Mən kinoda ölmək istəyirəm”. Sanki bu başlıq, bu müsahibə mənim üçün düşərli oldu. Sonralar mənə bir neçə filmdə ürəyimcə olan rol tapşırdılar. Arzuma çatdım – kinoda ölə bildim. İndi hərdən Laura xanımın yenə məndən müsahibə götürməsini arzulayıram. Amma bu dəfə başlığa “Milyonçu olmaq istəyirəm” başlığını çıxarmasını xahiş edərdim”. Aktyor L.Cəbrayıllını istedadlı, imzasını təsdiqləmiş publisist kimi qiymətləndirib, özüylə müsahibənin də böyük şəxsiyyətlər barədə yazıların yer aldığı dəyərli bir kitaba daxil edilməsini minnətdarlıqla xatırladıb.

“Azərbaycan” jurnalının baş redaktoru İntiqam Qasımzadə L.Cəbrayıllının sözü vaxtında və qədərində işlətməsini önəmli cəhət kimi qeyd edib: “Publisistika ilə ədəbiyyatın sərhədləri əslində şərtidir. Çünki mənim fikrimcə, insanlar əslində iki istiqamətə yönəlir: söz adamları və sözdən uzaq adamlar. Yazanları publisist, yazıçı deyə bölmək yox, söz adamı kimi təsnif etmək lazımdır. Laura Cəbrayıllı sözlə işləməyi bacaran əsl söz adamıdır. Onun yazılarını oxuduqca sözlə ustalıqla işləməyi bacaran sərraf olduğunu asanlıqla sezmək mümkündür”.

“Laura Cəbrayıllının yazdıqları müəyyən məqamlarda nəsrdən də üstündür. Onun publisistik yazılarında özünəməxsus üslubu var. İnanıram ki, Laura xanım gələcəkdə də bizi yeni kitabları ilə sevindirəcək”. Bu fikirləri tədbirdə yazıçı-dramaturq Elçin Hüseynbəyli səsləndirib.

Tanınmış jurnalist İsgəndər Allahverən dəyərli şəxsiyyətlər haqqında kitabda yer almış yazıların onda xüsusilə maraq doğurduğunu qeyd edib: “Laura Cəbrayıllının dünyadan köçmüş görkəmli insanlarımız haqqında yazılarını çox bəyənirəm. Bu baxımdan mərhum alim, böyük ziyalı Xudu Məmmədovla bağlı “Həmişə bizim Xudu” yazısı məni xüsusən təsirləndirib. Bu yazıda Laura xanım Xudu Məmmədovun həyatının maraqlı məqamlarını önə çəkməklə yanaşı, sözün köməyilə onun həqiqi portretini yaratmağa müvəffəq olub. Bütün bunlardan başqa, Laura Cəbrayıllının yazılarında nümunəvi qadın əxlaqı da öz əksini tapıb”.

Tənqidçi Rüstəm Kamal L.Cəbrayıllının publisistik yaradıcılığını özünəməxsus şəkildə dəyərləndirib: “Mən Laura xanımın yazılarını oxuyanda orada bir səs olduğunu hiss edirəm. Onun publisistikası səsli publisistikadır. O, səsi eşitməyi və onu yazılarına köçürməyi bacaran qələm sahibidir”.

Sonda L.Cəbrayıllı tədbirdə iştirak edən qonaqlara minnətdarlığını bildirib və kitabının nüsxələrini oxucular üçün imzalayıb.

L.Cəbrayıllının “Yeddinci qat” kitabında Azərbaycanın tanınmış elm, sənət adamları və ziyalıları Xudu Məmmədov, Sabir Əhmədov, Vidadi Məmmədov, Aydın Məmmədov, Şahmar Hüseynov, Fərman Kərimzadə, Rübabə Muradova, Şahmar Əkbərzadə, Mehdi Bəyazid, o cümlədən Vaqif Səmədoğlu, Anar, Vaqif Bayatlı, Yaşar və digərlərinin ədəbi portretləri ilə yanaşı, müxtəlif illərdə qələmə aldığı resenziyaları, müsahibələri, publisistik yazıları, esseləri, gündəliyindən sətirlər toplanıb. Dünyadan erkən köçmüş atasının xatirəsinə ithaf etdiyi kitabın əvvəlindəki ön söz əvəzi yazısında müəllif uşaqlığı, gəncliyi və atası ilə bağlı təsirli xatirələrini qələmə alıb. “Yeddinci qat”, müəllifin özünün yazdığı kimi, “Qırıq-qırıq həqiqətləri bu bütöv cümlələrdə qorumaq və toplamaq” istəyini həyata keçirmək məqsədi daşıyır.

S.MÜRVƏTQIZI

525-ci qəzet.- 2010.- 5 mart- S. 7.