“İsmət” filminin 75 yaşı qeyd olunub

Dövlət Film Fondunda ilk azərbaycanlı kinorejissorlardan Mikayıl Mikayılovun çəkdiyi “İsmət” filminin 75 illiyi münasibətilə tədbir keçirilib. Tədbirdə fondun direktoru, əməkdar incəsənət xadimi Cəmil Quliyev film və onun rejissoru haqqında söz açıb. Keçən il filmlə bağlı qiymətli sənədlər əldə edildiyini bildirən direktorun sözlərinə görə, ötən əsrin 30-cu illərində lentə alınmış “İsmət” filmi nəinki Azərbaycanın, hətta bütün Şərqin ilk qadın təyyarəçisi Leyla Məmmədbəyovaya həsr olunub: “Səssiz kinoya xas dinamiklik, aktyor oyunundakı cəsarətli və maraqlı detallar filmin daha baxımlı olmasını təmin edib”. Kinoşünas Aydın Kazımzadənin də çıxışı filmə və rejissorun yaradıcılığına həsr olunub. Film nümayiş etdirildikdən sonra L.Məmmədbəyovanın oğlu Xanlar Məmmədbəyov çıxış edərək, tədbirdə əməyi olanlara minnətdarlığını bildirib.

SARA

525-ci qəzet.- 2010.- 10 mart.- S. 7.