“Ulduz”un yeni sayı çapdan çıxıb

“Ulduz” ədəbi-bədii jurnalın növbəti sayı işıq üzü görüb. Jurnalın bu sayında Məmməd İlqar, Faiq Balabəyli, Həbib Səfər, Fərqanə Mehdiyeva, Mahmud Vəli, Şöhlət Əfşar, Mənsurə Qaçayqızı və başqalarının şeirləri dərc olunub. Dərgidə Rüstəm Kamalın Məmməd İlqarın yaradıcılığından bəhs edən yazısı da öz əksini tapıb. Jurnalın digər səhifələrində Rafiq Şamiloğlunun “Mötəbər söhbət”, “Məmişin yuxusu”, Ayxan Kiçikbəyin “Sevgi məktubları”, Sahilənin “Qorxu”, “Elə deyilmiş”, “Riyakar ruhlar”, “Dünyanın qarnı quruldayır” hekayələri oxuculara təqdim olunub. Sənətşünaslıq doktoru, əməkdar incəsənət xadimi İmruz Əfəndiyevanın “Azərbaycanda ifaçılıq məktəbinin yeni uğurları” başlıqlı məqaləsi də bu saydadır. Atababa İsmayıloğlunun “İsrafilin suru” satirası ilə yanaşı, dərgidə Molla Qeybullanın sərgüzəştlərilə bağlı lətifələr də var. Jurnalda, Bakı Slavyan Universitetinin professoru Telman Vəlixanlının tərcüməsində Dostoyevskinin “Karamazov qardaşları” romanının işıq üzü görməsi münasibətilə, professor Məmməd Qocayevin kitaba yazdığı ön sözdən bir hissə verilib. Herta Müllerin “Enişlər” kitabından “Qəbirüstü çıxış”, “Əlində kibrit qutusu tutan kişi” miniatürləri də jurnalın yeni sayındadır. Vahid Məmmədlinin “Tunc Allahın yükü” detektiv əsəri, yazıçı-dramaturq Elçin Hüseynbəylinin “Vulkan adam” hekayəsi də jurnaldakı maraqlı ədəbi materiallardandır.

Günel MUSAYEVA

525-ci qəzet.- 2010.- 11 mart.- S. 7.