“İmamzadə” tarixi-dini kompleksi haqqında monoqrafiya hazırlanıb

Bu günlərdə Milli Elmlər Akademiyası (AMEA) Gəncə Elm Mərkəzində prezident İlham Əliyevin Gəncədəki “İmamzadə” tarixi-dini kompleksinin təmiri və bərpası ilə əlaqədar imzaladığı sərəncamla bağlı yığıncaq keçirilib. AMEA-dan verilən məlumata görə, yığıncaqda çıxış edənlər prezident tərəfindən belə bir vacib addımın atılmasını ölkə başçısının milli-mənəvi dəyərlərimizə göstərdiyi diqqət və qayğısının təzahürü kimi qiymətləndiriblər. Alimlər 8-ci əsrdan yadigar qalan kompleksin məhv olmaq təhlükəsinin qarşısının alınacağını əminliklə vurğulayıblar. Yığıncaqda bildirilib ki, sözügedən elm mərkəzinin əməkdaşları bu nadir kompleksə dövlət başçısı tərəfindən göstərilən qayğıya uyğun olaraq, 400 səhifəlik elmi monoqrafiya hazırlayaraq çap üçün nəşriyyata təqdim ediblər. Yaxın günlərdə işıq üzü görəcək monoqrafiyada oxucular “İmamzadə” ziyarətgahı və onun ətrafında inşa edilən, sonralar təbii aşınmalar nəticəsində məhv olmuş tarixi tikililər haqqında daha ətraflı bilgilər almaq imkanı qazanacaqlar.

SARA

525-ci qəzet.- 2010.- 12 mart.- S. 7.