Novruz bayramı ilə bağlı silsilə tədbirlər keçirilir

ABŞ-ın Azərbaycandakı səfirinin iqamətgahında Novruz bayramı münasibətilə tədbir təşkil edilib. Səfirliyin əməkdaşları və onların ailə üzvləri üçün təşkil edilmiş tədbirdə Azərbaycan xalqının milli adət-ənənələrinə uyğun olaraq, masalara xonça və səmənilər düzülüb, bayram süfrəsi açılıb. ABŞ-ın ölkəmizdəki səfirinin səlahiyyətlərini icra edən Robert Qarverik milli bayram münasibətilə Azərbaycan xalqını təbrik edib və firavanlıq arzulayıb. Səfirliyin ictimaiyyətlə əlaqələr şöbəsinin rəhbəri Terri Devidson bildirib ki, Novruz baharın gəlişinin müjdəçisidir: “Ona görə də bu gün hamımız – həm azərbaycanlı, həm də amerikalı ailələr bu bayramı qeyd etmək üçün toplaşmışıq”. Mərasim milli musiqi və rəqslərlə davam edib.

Novruz bayramı Lənkəran şəhərindəki Osman Mirzəyev adına uşaq evində də qeyd olunub. Heydər Əliyev Fondunun təşəbbüsü ilə keçirilən Novruz şənliyinin sonunda uşaqlara bayram hədiyyələri paylanıb.

Sumqayıtda isə Hüseyn Ərəblinski adına Musiqili Dram Teatrının aktyorları Uşaq və Yeniyetmələrin Yaradıcılıq Mərkəzinin üzvləri ilə birlikdə maraqlı bayram proqramı təqdim ediblər.

SARA

525-ci qəzet.- 2010.- 18 mart.- S. 7.