"Azərbaycan"ın yeni sayı

JURNALIN BU NÖMRƏSİ TOFİQ ABDİNİN “DÖVLƏT ÇEVRİLİŞİ” POVESTİNİN VƏ VİLAYƏT QULİYEVİN TƏRCÜMƏSİNDƏ CORC ORUELİN “1984” ROMANININ DƏRC EDİLMƏSİLƏ ƏLAMƏTDAR SAYILA BİLƏR

“Azərbaycan” jurnalının 2010-cu ildəki ikinci sayı “Poeziya” bölməsilə açılır. Bu bölmədə xalq şairi Nəriman Həsənzadənin “Nuru paşa” poeması ilə yanaşı, Xasay Mehdizadə, Tamella Pərvin, Süleyman İsmayıl, Mahcamal, Rahil Məmməd, Rafiq Oday, Əjdər Fərzəli, Güloğlan Dünya, Cəfər Mehman Əliyev, Rafiq Dağlı və Kərəm Kürqıraxlının şeirləri dərc olunub.

“Tərcümə” bölməsində ingilis yazıçısı Corc Oruelin məşhur “1984” romanından bir hissə, görkəmli alim və publisist, tanınmış diplomat Vilayət Quliyevin orijinaldan tərcüməsində oxuculara təqdim olunub. Burada mütərcimin əsər haqqında fikirləri əks olunan “Totalitarizmi vahiməyə salan kitab” adlı yazısı da yer alıb. Məqalədə V.Quliyev romanla bağlı elmi-publisistik düşüncələrini özünəməxsus, oxunaqlı bir dillə qələmə alıb: “ABŞ-da nəşr olunan “Taym” jurnalı əsərin ilk nəşrinin 60 illiyi münasibətilə öz redaksiya məqaləsində “1984”ü son altmış ildə ingilisdilli ədəbiyyatın ən diqqətəlayiq nümunəsi adlandırıb. Altmış il ədəbiyyat üçün çox böyük tarix olmasa da, “1984” antiutopiyasının zamanın sınağından çıxdığını əminliklə söyləmək mümkündür. Roman indiyə qədər 70-dən çox dilə tərcümə olunub. Bu, bir müəllifin əsərinə müraciət baxımından ingilis ədəbiyyatı üçün rekord göstərici sayılır”. Tərcüməçi öz məqaləsində əsərin adı ilə bağlı mülahizə və faktlara da toxunub. V.Quliyev bu əsərin daşıdığı bədii-fəlsəfi mündəricə, humanist qayə ilə çağdaş Azərbaycan oxu mədəniyyətində öz yerini tutacağına inandığını vurğulayıb. Xatırladaq ki, buna qədər C.Oruelin “Heyvanıstan” adlı romanını da məhz V.Quliyev orijinaldan dilimizə tərcümə edib.

Şair Tofiq Abdinin “Dövlət çevrilişi” publisistik povesti də jurnalın bu sayında işıq üzü görüb. Tanınmış şairin yaddaş görüntülərinə əsaslanaraq qələmə aldığı “Dövlət çevrilişi” povestində gəncliyi ilə bağlı bir sıra maraqlı faktlar əks olunub. Türkçülük ideyalarına sadiq şairin, Sovetlərin qılıncının dalının da, qabağının da kəsdiyi vaxtlarda, yazdığı millətçi şeirlər səbəbindən DTK əməkdaşları tərəfindən dindirilmə səhnələri xüsusilə maraq doğurur. T.Abdin əsərdə qorxunc DTK-nın cəngindən necə qurtarması ilə bağlı düşüncələrini də yazıb: “Hansısa sehrli əl bizi qoruyurdu. Hansısa sehrli bir insan bu işin içindəydi və özünü göstərmədən bunu eləyirdi. Mən bu adamın Heydər Əliyev olduğunu düşünürdüm”.

Gülxanım Fətəliqızı “Ömürdən yarpaqlar” yazısında mərhum həyat yoldaşı, xalq şairi Məmməd Arazla bağlı xatirələrini qələmə alıb.

Dərginin bu sayında nəsrsevərlər Aydın Talıbzadənin “Marfuşa”, Yaqub Əlioğlunun “Güllələnmə” və Vüqar Tapdıqlının “Ağaclar susanda” hekayələri ilə tanış ola bilərlər.

Lalə Əfəndiyevanın “Qarabağ mövzusu rus ədəbiyyatşünaslığında” araşdırması jurnalın “Tənqid və ədəbiyyatşünaslıq” bölümündə öz əksini tapıb.

Dərginin “Söz meydanı”nda bu dəfə Nisə Bəyimin “Bütün həqiqət sözlərdədir” məqaləsi çap olunub.

“Söz xəzinəmizdən” başlığı altında “Əlyazmalar İnstitutunun nəşrləri” Paşa Əlioğlunun təqdimatında verilib.

“Kitablar, rəylər” rubrikasında İfrat Əliyevanın “Tərcümə problemlərini elmi şərhi”, Südabə Ağabalayevanın “Elindən xəbərin varmı”, “Allah yaxın, Vətən uzaq”, “Udulmayan döyüş qalıb” yazıları yer alıb.

S.MÜRVƏTQIZI

525-ci qəzet.- 2010.- 30 mart.- S.7.