Xalq şairi Rəsul Rzanın yubileyilə bağlı elmi sessiya təşkil edilib

Azərbaycan Milli Elmlər Akademiyasının(AMEA) Nizami adına Ədəbiyyat İnstitutunda xalq şairi Rəsul Rzanın anadan olmasının 100 illik yubileyinə həsr edilmiş elmi sessiya keçirilib. AMEA-dan verilən məlumata görə, tədbiri giriş sözü ilə açan institutun direktoru, akademik Bəkir Nəbiyev XX əsr Azərbaycan ədəbiyyatının görkəmli nümayəndələrindən olan R.Rzanı söz sənətimizə forma və məzmunca yeniliklər gətirərək novator şair kimi səciyyələndirib: “Böyük şairin 100 illik yubileyinin geniş şəkildə qeyd edilməsi ilə bağlı prezidentin imzaladığı sərəncam ölkəmizdə ədəbiyyatın inkişafına, sənət adamlarına göstərilən diqqət və qayğının daha bir bariz nümunəsidir. Artıq ölkəmizdə və onun hüdudlarından kənarda Rəsul Rzanın yubileyi ilə bağlı silsilə tədbirlər keçirilir. Zaman göstərir ki, Rəsul Rza poeziyası əbədiyaşar poeziyadır. Onun yaradıcılığı gündən-günə gəncləşərək, daim müasir qalır, hər zaman özünə yeni oxucular tapır. Azərbaycan dilinin poetik potensialının yeni-yeni imkanlarını üzə çıxaran R.Rza yarım əsrə yaxın dövrdə yüksək dəyərli bədii nümunələr meydana gətirməklə yanaşı, respublikamızın elmi-mədəni həyatında yaxından iştirak edib, dolğun və səmərəli ictimai fəaliyyəti ilə tanınıb”.

Fəlsəfə elmləri doktoru, professor Rahid Ulusel R.Rzanın həyat və yaradıcılığından bəhs edən geniş məruzəni sessiya iştirakçılarının diqqətinə çatdırıb. Məruzəçi ilk şeirlərindən müasirlik ruhu ilə seçilən, lirik şair kimi diqqəti cəlb edən R. Rzanın illər ötdükcə yeni-yeni orijinal yaradıcılıq nümunələri ilə ədəbiyyatımızda əbədi yaşamaq şansını qazanmış sənətkarlardan birinə çevrildiyini vurğulayıb. Elmi sessiyada tanınmış ədəbiyyat tədqiqatçıları R.Rza və onun poeziyası barədə fikirlərini bölüşüblər. Sonda elmi sessiyanın iştirakçılarına minnətdarlığını bildirən R.Rzanın oğlu, Yazıçılar Birliyinin sədri, xalq yazıçısı Anar çıxışında ədəbiyyatımızın, mədəniyyətimizin inkişafı naminə böyük zəhmət bahasına uğurlar qazanan hər bir kəsin yad edilməyə haqqı olduğunu deyib.

SARA

525-ci qəzet.- 2010.- 4 may.- S.7.