Dünya Gənc Türk Yazarlar Birliyi dörd kitab nəşr etdirib

Dünya Gənc Türk Yazarlar Birliyinin layihəsi çərçivəsində dörd kitab nəşr olunub. Layihənin rəhbəri, sözügedən birliyin sədri, şair Əkbər Qoşalının bildirdiyinə görə, türk dilində çıxan “Çağdaş Azərbaycan şeiri – 2” adlı kitab Prezident yanında Qeyri-Hökumət Təşkilatlarına Dövlət Dəstəyi Şurası tərəfindən maliyyələşdirilən “Yeni nəsil Azərbaycan ədəbiyyatının təbliği” layihəsi əsasında işıq üzü görüb. Bu antologiyada ölkəmizdə yaşayıb-yaradan 43 gənc və orta nəsil yazarın yaradıcılıq nümunələri toplanıb. Digər üç kitab isə Gənclər və İdman Nazirliyinin maliyyələşdirdiyi “Kitablı dünya” layihəsi çərçivəsində çap edilib. “Azərbaycan şeirlər toplusu”nda tanınmış şairlərin vətənə həsr olunmuş şeirləri toplanıb. “Şeir çələngi” antologiyasında türk dünyası söz sənətinin yeni nəsillərini təmsil edən, ədəbiyyata ötən yüzilliyin 80-ci illərindən sonra gəlmiş 58 şairin poetik nümunələri öz əksini tapıb. “Nakam şairin şeirlər kitabı” isə 31 yaşında vəfat etmiş Hamlet Kazımoğlunun yaradıcılığından bəhs edir.

SARA

525-ci qəzet.- 2010.- 6 may.- S.7.