Muzey Mərkəzində Ənvər Əsgərovun əsərləri sərgilənir

Muzey Mərkəzinin Sərgi Qalereyasında əməkdar rəssam Ənvər Əsgərovun 70 illiyi ilə bağlı yubiley sərgisi təşkil olunub. Muzey Mərkəzindən verilən məlumata görə, ekspozisiyada rəssamın son illərdə yaratdığı 85-dən çox yeni rəngkarlıq əsəri sərgilənir. Sərginin açılış mərasimində çıxış edən mədəniyyət və turizm nazirinin müavini Ədalət Vəliyev, xalq rəssamları Ağaəli İbrahimov, Arif Hüseynov və başqaları Ə. Əsgərovun özünəməxsus yaradıcılıq üslubuna malik olmasını qeyd ediblər. Çıxışlarda Ə. Əsgərovun həyat və yaradıcılıq yolundan söhbət açılıb: “Ənvər Əsgərov 1940-cı ildə Bakıda anadan olub. Əzim Əzimzadə adına Bakı Rəssamlıq Məktəbində Kamil Xanlarov və Lətif Feyzullayev kimi tanınmış rəssamlardan dərs alıb. Daha sonra Sankt-Peterburqda Muxina adına Ali Sənaye Rəssamlığı İnstitutunu bitirib. 1968-ci ildən Azərbaycan Rəssamlar İttifaqının üzvüdür. 1994 və 2003-cü illərdə Bakıda fərdi sərgiləri təşkil edilib”. Çıxış edənlər rəssamın əsərlərinin Rusiya Mədəniyyət Nazirliyinin fondunda, Azərbaycan Dövlət İncəsənət Muzeyində, Dövlət Rəsm Qalereyasında və bir çox şəxsi kolleksiyalarda saxlanıldığını diqqətə çatdırıblar.

SARA

525-ci qəzet.- 2010.- 6 may.- S.6.