“Azərbaycanda yaşayan milli azlıqların nəşrləri” təqdim edilib

Ötən gün Media Mərkəzində Nəsiman Yaqublunun “Azərbaycanda yaşayan milli azlıqların nəşrləri” kitabının təqdimatı keçirilib. Kitabda Azərbaycanda yaşamış və hazırda yaşayan milli azlıqların nəşr nümunələri sistemli şəkildə araşdırılıb öyrənilməklə, bu barədə maraqlı məlumatlar verilib. Rus, polyak, erməni, gürcü, ləzgi, talış, kürd dillərində nəşr olunan qəzetlərin adları və çap olunma tarixləri göstərilib. “Tolişi Sədo”, 1907-ci ildə Bakıda polyak dilində nəşr olunan “Faris” qəzeti, ləzgi mətbuatından “Samur”, kürd dilində çıxan “Denge kürd” qəzetlərindən məqalələr və seçilmiş ədəbiyyat nümunələri də kitaba daxil edilib.

N.Yaqublu Azərbaycanın, eləcə də vətənimizdə yaşayan milli azlıqların nəşr etdiyi qəzetlərin tarixi haqqında danışıb və bu cür topluların gələcəkdə də araşdırılıb çap olunmasına ehtiyac duyulduğunu qeyd edib.

BDU-nun professoru Qulu Məhərrəmli bu toplunun milli mətbuatımız üçün çox dəyərli bir fakt olduğunu vurğrlayıb: “Bu cür layihələrin dəstəklənməsinin Azərbaycan cəmiyyətində tolerantlığın inkişafında önəmli rol oynayacağına inanıram”.

Dosent Pərvanə Məmmədli və digər tədbir iştirakçıları da toplunun əhəmiyyətini vurğulayıblar.

Açıq Cəmiyyət İnstitutunun dəstəyilə hazırlanan kitab jurnalist təşkilatlarının, qeyri-hökumət təşkilatlarının, yazılı və elektron media təmsilçilərinin, eləcə də jurnalistika fakültəsinin tələbələri üçün nəzərdə tutulub.

GÜNEL

525-ci qəzet.- 2010.- 7 may.- S.7.