Azərbaycanlı vokalçı beynəlxalq müsabiqənin birincisi olub

Aprelin 27-dən mayın 2-dək İtaliyanın Matera şəhərində keçirilən Vokalçıların 10-cu Roza Ponsel adına Beynəlxalq Müsabiqədə azərbaycanlı vokalçı Cavid Səmədov 100 baldan 98 bal toplayaraq 1-ci yeri qazanıb. Bu barədə Mədəniyyət və Turizm Nazirliyinin mətbuat xidmətindən məlumat verilib. Müsabiqə 2 tur və finaldan ibarət olub. Təşkilatçılar Cavidin ifasını Youtube-da izləyib, özləri onu taparaq, müsabigəyə dəvət ediblər. Müsabiqədə 10-12 ölkə iştirak edib. Onların arasında Koreya, Malayziya, İtaliya, Yaponiya, Misir, Rusiya, Azərbaycan və s. ölkələr olub. Qeyd edək ki, Cavid Səmədov Mədəniyyət və Turizm Nazirliyinin maliyyə dəstəyi ilə 2008-2010-cu il müddətində İtaliyanın Ozimo şəhərində yerləşən Ozimo Opera Sənəti Akademiyasında hazırlıq kursunu keçir. Bu müddətdə dünyanın tanınmış opera sənəti ustalarından – Raina Kabaivanska, Uilliam Mateuzzi, Antonio Yuvarra, Serjio Segalini, Lella Cuberli kimi sənətçilərdən ustad dərsləri alıb. Təhsil aldığı müddətdə Akademiyanın təşkil etdiyi 8 konsertin hər birində iştirak edib.

SARA

525-ci qəzet.- 2010.- 7 may.- S.7.