Abbas Abdullanın yubileyi Yazıçılar Birliyində qeyd olunub

Dünən Yazıçılar Birliyində (AYB) görkəmli şair, tanınmış tərcüməçi Abbas Abdullanın 70 illik yubileyi və “Seçilmiş əsərləri”nin təqdimatı ilə bağlı mərasim keçirilib. Tədbirin aparıcısı AYB-nin birinci katibi, xalq şairi Fikrət Qoca A.Abdullanı “həmişə özünə müxalifətdə dayanan şair” kimi səciyyələndirib. Şairin təqdim olunan kitabı haqqında danışan F.Qoca yubilyarın əsərlərinin məziyyətlərindən söz açıb: “ İndiyədək Abbas Abdullanın şeirlərini oxumamış olsaydım belə, təkcə bu seçilmiş əsərlər onun yaradıcılığı, daxili dünyası ilə tanış olmağa kifayət edərdi”.

AYB sədri, xalq yazıçısı Anar çıxışında A.Abdullanın öz yubileyinə dəyərli bir nəşr hədiyyə etdiyini önə çəkib: “Abbas Abdullanın yubileyinə gəlməmişdən əvvəl yeni kitabındakı şeirlərlə bugünlərdə bir daha tanış oldum. Kitabda Abbas Abdullanın Ukrayna və gürcü şairləri ilə dostluğu öz əksini tapıb. Abbas Abdulla həmişə millətçi şair olub. Amma onun millətçiliyi öz xalqına məhəbbət, başqa xalqlara hörmət səviyyəsindədir. O, öz əqidəsinə sadiq şairdir”. Sonra AYB sədri qurum adından yubilyara xatirə hədiyyəsi təqdim edib. Xalq yazıçısı son günlərdə bəzi qəzetlərdə AYB-də yubileyi keçirilən şairlərlə bağlı gedən qərəzli məlumatlar haqqında da fikrini bildirib: “Məni dəyərli şairimiz İlyas Tapdığın yubileyində iştirak etməməkdə qınayanlara bildirim ki, həmin vaxt mən Türkiyədə Rəsul Rzanın 100 illik yubiley tədbirində idim. Mən İlyas Tapdığı sevirəm, amma Rəsul Rzanı da sevirəm. O ki qaldı AYB-də gədəbəylilərə qarşı ayrı-seçkilik söhbətlərinə, yaxşı fikir versələr, haqsız olduqlarını başa düşərlər. Mən bir daha İlyas Tapdığın da yanında gədəbəylilərə olan sevgimi izhar edirəm”.

Yazıçı Nahid Hacızadə A.Abdulla ilə bağlı gənclik xatirələrini tədbir iştirakçıları ilə bölüşüb: “ Abbas Abdulla ədəbiyyatda özü olan, sözü olan şairdir. Kitabları sayca azdır, amma yazdıqlarının məna yükü, dəyəri çox sanballıdır”. N. Hacızadə Abbas Abdulla poeziyasının Ukrayna və Gürcüstanda da çox sevildiyini diqqətə çatdırıb.

Yazıçı Mahirə Abdulla uzun illərdir Abbas Abdulla ilə bərabər işlədiyini və onu yaxından tanıdığını söyləyib: “Atalar deyib ki, insanı yaxşı tanımaq üçün onunla yol yoldaşı olmalısan. Mən isə əlavə edərdim ki, insana yaxından bələd olmaq üçün həm də onunla işləmək, iş yoldaşı olmaq lazımdır. Mən xeyli müddətdir ki, Fikrət Sadıqla və Abbas Abdulla ilə bir otaqda otururam. Onların yanında mən əsl həyat və yaradıcılıq məktəbi keçmişəm. Onların hər ikisindən öyrəniləsi çox şey var”. M.Abdulla A.Abdullanı ədəbiyyatımızda danılmaz fakt adlandırıb: “Türkçülüklə bağlı həqiqətlər saxtalaşdırılanda onun qəzəbinin həddi-hüdudu olmur. Abbas Abdulla bütün ruhu, qəlbi, canı ilə türk oğlu türkdür. Bu keyfiyyətinə görə ona böyük hörmətim və sevgim var”.

Tənqidçi Vaqif Yusifli A.Abdullanın özünün çox sevdiyi şairlərin sırasında olduğunu qeyd edib. Şairin yaradıcılığı haqqında danışan tənqidçi Abbas Abdullanın poeziyasındakı əsas istiqamətlərdən danışıb: “O bütün yaşlarında indiki Abbas Abdulladır. Onun “Ukrayna naxışları” silsiləsi ilə tanış olanda elə fikirləşirsən ki, bunları yazan ukraynalı şairdir. Eləcə də “Türkiyə dəftəri”ni oxuyanda onun necə böyük türkçü, turançı olduğunu görürük. Abbas Abdulla üçün heca da, sərbəst vəzn də eyni dərəcədə doğmadır. Onun üçün başlıca yerdə fikirlə hissin birliyini ortaya qoyan Şeir dayanır”. A.Abdullanın yetmişinci illərdə qələmə aldığı “Göy üzünə yazılmış şeirlər” silsiləsindən söz açan V.Yusifli burada müasir poetik təfəkkürün xalq şeiri sintezini yaratdığını nəzərə çatdırıb: “Bu silsilədə sərbəst şeir də var, heca da. Amma professional oxucu bunu düşünmür, çünki ortada əsl şeir var”. Tənqidçi A.Abdullanın ana dilimizdən əlavə, rus, türk, ukrayna və gürcü dillərini mükəmməl bildiyini və orijinaldan çox dəyərli tərcümələr etdiyini çıxışında vurğulayıb.

“Abbas Abdulla həm şeirlərinə, həm şəxsiyyətinə görə haqqında söhbət açılmağa layiq böyük şairdir. Onun bütöv şəxsiyyəti olduğu kimi, fərqli də yaradıcılığı var. Onu hələ ilk gənclik illərimdən tanıyıram. Həmişə nəyəsə ehtiyacımız olanda onun yanına gedərdik. Gözümüzə baxanda ürəyimizi oxuyardı”. Bu fikirləri tədbirdə AYB-nin katibi, şair Arif Əmrahoğlu səsləndirib.

Mədəniyyət və Turizm Nazirliyinin şöbə müdiri, şair Vaqif Bəhmənli A.Abdulllanın şair, tərcüməçi, araşdırmaçı, redaktor kimi fəaliyyətini çıxışında önə çəkib. V.Bəhmənli A. Abdullanı beş ölkənin şairi adlandırıb: “ Abbas Abdulla Azərbaycanla yanaşı Ukrayna, Gürcüstan, Rusiya və Türkiyədə də sevilən şairdir. Bu ölkələrin ədəbi mühitində o, özünü suda balıq kimi hiss edir. Abbas Abdulla ədəbiyyata 60-ci illərdə gəlsə də, 70-80-ci illərdə yenidən poeziyasında bir təzələnmə, canlanma hiss olunub. O, hər dəfə yeni ədəbi nəsillə birgə ədəbiyyata gəlir. Bu baxımdan onu yaz təbiətli şair adlandırmaq olar. Onun şeirlərində çağdaşlıqla saz ruhu sintez şəklində qovuşur”.

Şair Kələntər Kələntərli A. Abdullanın rəhbərlik etdiyi dövrdə “Ulduz” jurnalında gənc yazarlara, yeni ədəbi nəslin yaradıcılığına böyük önəm verildiyindən danışıb.

Sonda çıxış edən yubilyar yaradıcılığına göstərilən diqqətə görə tədbirin təşkilatçılarına və iştirakçılarına minnətdarlığını bildirib.

S.MÜRVƏTQIZI

525-ci qəzet.- 2010.- 13 may.- S.7.