“Şirvanşahlar Saray Kompleksinin inciləri” sərgilənib

İçərişəhərdə ümummilli lider Heydər Əliyevin 87-ci ildönümünə həsr edilmiş “Şirvanşahlar Saray Kompleksi Dövlət Tarix-Memarlıq qoruq-muzeyinin fond materiallarından incilər” mövzusunda sərginin açılışı olub. Mərasimdə Nazirlər Kabineti yanında “İçərişəhər” Dövlət Tarix-Memarlıq Qoruğu İdarəsinin rəisi Mikayıl Cabbarov çıxış edərək 18 May – Beynəlxalq Muzeylər Günü ərəfəsində açılan sərginin ən yüksək səviyyədə keçirilməsi üçün idarə tərəfindən Şirvanşahlar sarayında abadlaşdırma işləri görüldüyünü qeyd edib: “İşıqlandırma sistemi yenidən qurulub, eksponatların nümayişi həyata keçirilən otaqlarda kamera-nəzarət sistemi təşkil olunub. Sərgidə arxeoloji qazıntılar zamanı tapılmış əşyalar, qədim xalça və xalçaçılıq məmulatları, etnoqrafik nümunələr, metal məmulatları, rəsmlər, sikkələr nümayiş etdirilir. Əksəriyyəti ilk dəfə nümayiş olunan eksponatlar “Şirvanşahlar Saray Kompleksi” Dövlət Tarix-Memarlıq qoruq-muzeyi fondunun nadir və qiymətli nümunələridir”.

Mayın 10-da – ümummilli lider Heydər Əliyevin anadan olmasının 87-ci ildönümü günündə muzeyə giriş pulsuz olub. Mayın 18-də Beynəlxalq Muzeylər günündə də tamaşaçılara pulsuz xidmət göstəriləcək.

Qeyd edək ki, bugünlərdə İçərişəhərin ərazisində yerləşən “Kiçik karvansaray” abidəsində paytaxtda analoqu olmayan “İncəsənət bağı” istifadəyə verilib. Mədəniyyət ocağı milli təsviri və dekorativ-tətbiqi sənət mərkəzi kimi fəaliyyət göstərəcək. Burada xalçaçılıq, ağac üzərində oyma, keramika, zərgərlik, milli geyimlər, dekorativ yaşıllaşdırma və digər tətbiqi sənət işləri nümayiş etdiriləcək. Eyni zamanda gənc rəssamların yaradıcılığının təbliği məqsədilə rəsm sərgilərinin təşkil edilməsi nəzərdə tutulur. İncəsənət bağının yaradılmasında məqsədlərdən biri də İçərişəhərin turizm infrastrukturunun zənginləşdirilməsi və xalq sənətkarlığının dəstəklənməsidir. “İncəsənət bağı”nın açılışı günü ilk sərgi qədim paytaxta həsr edilib. Rəssam Elmira Abbaslının “Köhnə Bakı tipləri” adlı kukla kolleksiyası nümayiş etdirilib. Kukla kolleksiyasına “Mirzə Abbas”, “Abdulla bəy”, “Zəngin xanım Mənzər”, “Qoçu Həsənbala”, “Tacir Heybətqulu” kimi 19-cu əsrdə Bakının məşhur sakinlərinin obrazlarının təsvir edildiyi 12 kukla daxildir. Rəssam kolleksiyanı 10 ay müddətinə ərsəyə gətirib.

SARA

525-ci qəzet.- 2010.- 13 may.- S.7.