Firidun Rüstəmlinin “Könül nəğmələri”

Bu yaxınlarda şair və pedaqoq Firidun Rüstəmlinin 70 yaşı tamam olur. F.Rüstəmli 1940-cı ildə Vedi rayonunun Avşar kəndində dünyaya gəlib. 1951-ci ildə ailəsilə birgə Ağcabədiyə köçməli olub. 44 il Bakıda Xətai rayonunun 165 saylı orta məktəbində çalışıb, pedaqoqun yetirmələri elmin müxtəlif sahələrində özünü təsdiqləyən mütəxəssislər kimi fəaliyyət göstərirlər. 2006-cı ildən təqaüdə çıxan F.Rüstəmli uzun illərdir pedoqoji fəaliyyətlə yanaşı, bədii yaradıcılıqla da məşğul olur. İndiyədək bir neçə kitabı çap olunan şairin son poetik yaradıcılıq nümunələri “Vektor” Nəşrlər Evində işıq üzü görən “Könül nəğmələri” kitabında toplanıb. Kitabın nəşrində şairin dostları Bəxtiyar Əkbərov, Zahiddin Abbasov, Əliş Əliyev, professor Elçin İsgəndərzadə və şair Tofiq Abdinin önəmli rolu olub. Ön sözdə kitabın tərtibçiləri F.Rüstəmli ilə bağlı fikir və düşüncələrini oxucularla bölüşüblər: “Firidun müəllim öz vətənini, xalqını, millətini, ana yurdunu ürəkdən sevən poeziya vurğunu, gözəl, istedadalı bir şair olmaqdan əlavə, həm də dostluqda son dərəcə sədaqətli, dost yolunda misilsiz fədakarlıq göstərən əsl qardaşdır”. Kitabın dostluq töhfəsi kimi oxuculara təqdim olunduğu da ön sözdə qeyd edilib.

Şairin “Könül nəğmələri”ndəki şeirlər bir neçə bölümdə oxuculara təqdim edilib. İlk bölmədə F. Rüstəmlinin 1970-80-ci illərdə qələmə aldığı şeirlər toplanıb. Şairin bu illər ərzində qələmə aldığı şeirlərdə müxtəlif mövzular öz əksini tapıb. Ancaq şeirlərin əsas mövzusunu ana məhəbbəti, vətənin dərdlərini ürəyində çəkən bir vətəndaş təəssübkeşliyi, insan məhəbbəti, tənhalıq duyğuları, haqsızlıqlarla barışmayan şair qəlbinin düşüncə və fəryadları təşkil edir. “Salam, səksəninici illər” bölməsindəki şeirlərdə daha çox şairin ictimai-siyasi dünyagörüşü, dünyada və ölkədə baş verən proseslərə, hadisələrə münasibəti əks olunub. Bu bölmədəki şeirlərdə məhəbbət duyğularının tərənnümü də öz əksini tapıb.

Azərbaycanın müstəqillik əldə etdikdən sonra üzləşdiyi problemlər, Qarabağ müharibəsinin ağrı-acıları, xalqımızın üzləşdiyi bəlalar, soydaşlarımızın başına gətirilən müsibətlər, şəhidlərimizin xatirəsinə dərin hörmət hissi, 20 Yanvar və digər faciələrimizlə bağlı şairin qələmə aldığı şeirlər kitabın “Ağrılı 90-lar” bölməsində yer alıb. Kitaba F.Rüstəmlinin “Onlar görüşmədi”, “Talesiz qadın” və “Yuxu” poemaları da daxil edilib.

Dəyərli şair və pedaqoqumuzu 70 yaşı münasibətilə təbrik edir, ona cansağlığı, uzun ömür və yeni yaradıcılıq uğurları arzulayırıq!

S.MÜRVƏTQIZI

525-ci qəzet.- 2010.- 14 may.- S.7.