“Mənim doğma vətənim” mövzulu fotosərgi açılıb

Dünən İçərişəhərdə yeni açılan İncəsənət Bağında Gənclər və İdman Nazirliyinin təşkilatçılığı ilə “Mənim doğma vətənim” fotomüsabiqəsinin yekunlarına həsr edilən foto sərgi keçirilib. Sərginin açılışında çıxış edən gənclər və idman nazirinin müavini İntiqam Babayev sərginin keçirilməsində əsas məqsədin ölkədə foto sahəsində istedadlı gənclərin üzə çıxması, bu sahəyə yaradıcı gəncliyin marağının artırılması olduğunu diqqətə çatdırıb: “Bu sərgi “Avropa: Ümumi İrs” və “Avropa Mədəni İrs Günləri” kampaniyası çərçivəsində, 2010-cu ilin aprel-may aylarında ölkənin əksər regionlarını əhatə edən gənc fotoqraflar arasında “Mənim doğma vətənim” müsabiqəsinin nəticəsi kimi keçirilir. Fotomüsabiqə əsasən 16-24 yaş həddində olan gənclər arasında gerçəkləşib. Gənclər və İdman Nazirliyi və Fotoqraflar Birliyinin birgə təşkilatçılığə ilə keçirilən müsabiqəyə 1000-ə yaxın şəkil təqdim olunub ki, burada keçirilən sərgidə onlardan 400-ü seçilib. Sərgidən sonra münsiflər heyəti son qərarını verərək, qalib gəlmiş fotoşəkilləri İspaniyanın Barselona şəhərində dərc olunaraq bütün Avropa ölkələrinə yayılan kataloqda nəşr edilməsi üçün oraya göndərəcəklər”. İ.Babayev deyib ki, eyni zamanda qaliblər Gənclər və İdman Nazirliyi və Avropa Şurası tərəfindən diplomlarla təltif olunacaqlar.

S.QARAYEVA

525-ci qəzet.- 2010.- 15 may.- S.17.