Milli Kitabxanada “Sevgi fəsli”nin təqdimatı keçirilib

Ötən gün M.F.Axundov adına Milli Kitabxanada Mədəniyyət və Turizm Nazirliyinin layihəsi əsasında işıq üzü görən “Sevgi fəsli” kitabının təqdimat mərasimi keçirilib.

Tədbiri giriş sözü ilə kitabxananın direktoru Kərim Tahirov açaraq, kitabın “Bakı islam mədəniyyətinin paytaxtıdır–2009” tədbirləri çərçivəsində nəşr edildiyini bildirib: “Bu qəbildən olan kitabların təbliği zəruridir. Biz bu toplunun islam ölkələrinə göndərilməsini təmin edəcəyik”.

Kitabın tərtibçisi və redaktoru Ağacəfər Həsənli yeni nəşri azad sözün təntənəsi kimi qiymətləndirib. O qeyd edib ki, “Çinar-çap” nəşriyyatında buraxılan “Sevgi fəsli”nə islam ölkələri ədəbiyyatının istedadlı nümayəndələrinin şeirləri daxil edilib. Tərtibçi kitab hazırlanarkən müəyyən çətinliklərlə üzləşdiklərini, Milli Kitabxananın kollektivinin bu işdə onlara dəstək verdiyini deyib. A.Həsənli layihənin davamlı olacağını qeyd edib: “Mədəniyyət və Turizm Nazirliyi layihəni bundan sonra da davam etdirmək niyyətindədir. Bu çərçivədə digər islam ölkələri şairlərinin yaradıcılığı ilə Azərbaycan oxucusunu tanış etməyi qarşımıza məqsəd qoymuşuq”.

Topluda Türkiyədən Mehmet Akif Ərsoy, Nazim Hikmət, İsmət Özəl, Nəcib Fazil Qısakürək, Orxan Vəli, Səzai Qaraqoç, Cahid Zarifoğlu, Cəmal Safi kimi tanınmış türk şairlərinin şeirləri yer alıb. Almanaxda Azərbaycan şairlərindən Bəxtiyar Vahabzadə, Məmməd Araz, Əli Kərim, Musa Yaqub, Sabir Rüstəmxanlı, Çingiz Əlioğlu, Vaqif Səmədoğlu, Zəlimxan Yaqubun şeirləri toplanıb. Bundan başqa, sözügedən kitaba İraq, İran, Qazaxıstan, Pakistan, Misir, Türkmənistan, Tacikistan, Fələstin, Tatarıstan və Abxaziyanın məşhur şairlərinin dilimizə tərcümə edilmiş poetik nümunələri daxildir.

SARA

525-ci qəzet.- 2010.- 20 may.- S.7.